Reseıdiń eń romantıkalyq qalalary ataldy
ASTANA. QazAqparat - TripAdvisor týrıstik servısi saıahatshylardan saýaldama jınap, Reseıdiń eń romantıkalyq on qalasyn anyqtady, dep habarlady Lenta.rý.
Týrıster Baltyq teńizi jaǵasyndaǵy kýrorttar men «Altyn saqına» beldeýindegi qalalardy kóbirek tańdaǵan.
Tizimge jas jubaılar men erli-zaıypty adamdardyń romantıkalyq demalysyna jaıly qonaqúıleri, meıramhanalary jáne kórnekti oryndary bar qalalar kirdi.
Birinshi orynǵa Sankt-Peterbýrg qalasy mańynda ornalasqan Petergof qalasy shyqty, ol óziniń saraı-saıabaq ansamblimen, baqqa jáne sýburqaqtarǵa oranǵan Úlken saraıymen tanymal. Munda ásirese úılenip jatqan jas jubaılar fotosessııaǵa túsý úshin kóptep keledi.
Ekinshi oryn Baltyq teńiziniń jaǵasyndaǵy Zelenogradskige berildi. Ol óziniń tabıǵatymen jáne jaǵajaılarymen týrısterdi tartady. Úshinshi orynda Rostov Velıkıı. Munda kelgen týrıster sáýlet eskertkishterin, monastyrlar men shirkeýlerdi, HVII ǵasyrda salynǵan aqshańqan Kremldi tamashalaıdy.
Osyndaı qalalar ondyǵyna Vyborg, Sýzdal, Svetlogorsk, Lıstvıanka, Pereslavl-Zalesskıı, Ýglıch, Pskov endi.
