Reseıdiń Ekonomıkalyq damý mınıstri $2 mln. para aldy degen kúdikpen ustaldy
ASTANA. QazAqparat - Para aldy dep aıyp taǵylǵan Reseıdiń Ekonomıkalyq damý mınıstri Alekseı Ýlıýkaevke qatysty qylmystyq is qozǵaldy. Bul týraly Reseı Tergeý komıteti habarlady, dep jazdy Bı-bı-sı.
Tergeý komıteti saıtynda jarııalanǵan aqparatqa súıensek, Ýlıýkaev 2016 jyly 14 qarashada "Rosneft" kompanııasyna oń baǵa bergeni úshin 2 mıllıon dollar kóleminde para alǵan. Osynyń arqasynda, "Rosneft" "Bashneft" aktsııasynyń memlekettik paketin ıelený týraly kelisimdi bekitken.
«2016 jyly 15 qarashada Reseı federaldy qaýipsizdik qyzmeti júrgizgen keshendi jedel shara qorytyndysy boıynsha RF Tergeý komıteti asa mańyzdy isterdi tergeý jónindegi Bas tergeý basqarmasy ekonomıkalyq damý mınıstri Alekseı Ýlıýkaevke qatysty qylmystyq is qozǵady», - delingen habarlamada.
Alekseı Ýlıýkaev ustaldy, Tergeý komıteti jaqyn arada oǵan aıyp taǵyp, bultartpaý sharasyn qoldaný týraly ótinish jazýdy josparlaýda. Interfaks derekkózge silteme jasaı otyryp, Ýlıýkaevtyń para alý kezinde ustalǵanyn habarlady.
