Reseıdiń bas múftıi musylmandardy Qurban aıt merekesimen quttyqtady
MÁSKEÝ. QazAqparat - Búgin álemniń barlyq musylmandary ózderiniń bas merekeleriniń biri - Qurban aıt merekesin atap ótýde. 1 qyrkúıek Adygeı, Bashqurtstan, Tatarstan jáne birqatar Soltústik Kavkaz elderinde resmı týrde demalys kúni dep jarııalandy. 2 mln musylman turatyn Máskeý jáne Máskeý mańynda merekeleý jáne qulyshylyq sharalary 39 alańda ótkizilýde, olardyń qatarynda eń iri kólemdegi basty sharalar Máskeý sobor meshitinde atalyp ótip jatyr.
Reseıdegi múftıleri keńesiniń basshysy Ravıl Gaınýtdınniń qatysýymen Reseı astanasy sobor meshitindegi merekelik namazǵa qatysýǵa shamamen 300 myń musylman keldi. Barlyq musylmandardy Qurban aıt merekesimen quttyqtap Reseı múftıleri keńesiniń basshysy Ravıl Gaınýtdın sóz aldy.
«Qurmetti meniń baýyr-qaryndastarym, qadirli dindesterim, otandastarym. Búgin kúlli ıslam álemi Islam Id Ál-Adhanyń Qurban baıram merekesin atap ótýde... Búgin biz halyqtar arasynda ózara túsinistik jáne yntymaqtastyq bolýyn, dinder arasynda konstrýktıvti dıalog bolýyn tilep jalbarynamyz. Alla taǵaladan beıbitshilik, tynyshtyq jáne turaqtylyq berýin tileımiz», - dedi Gaınýtdın. 
