Reseıdiń avtokólik naryǵyndaǵy daǵdarys Qazaqstanǵa qalaı áser etedi
«Birinshi jartyjyldyqta Reseıde jeńil kólik óndirisi 2021 jyldaǵy qańtar-maýsymǵa qaraǵanda 61,8 paıyzǵa, ıaǵnı 279,2 myń mashınaǵa deıin azaıdy. Reseılik kólik markalarynyń óndirisi 66,1 paıyzǵa (76,5 myńǵa deıin), shetel markasyna tıesili avtokólik 59,9 paıyzǵa (202,7 myńǵa deıin) tómendedi», - delingen taratylǵan málimette.
Reseıge qatysty sanktsııalar bul eldiń avtokólik óndirisi men naryǵyna da yqpal etti. Bıyl naýryz aıynda birqatar shetel avtokólik óndirýshisi RF-tegi ózderiniń qyzmetin ýaqytsha toqtatatynyn málimdedi. Kompanııalar reseılik zaýyttardaǵy kólik óndirisin doǵaryp, dılerlerge jańa kólikti jetkizýdi toqtatty.
Qazirgi kezde «AvtoVAZ» tek Lada Niva jáne Lada Granta sııaqty eki modeldi ǵana shyǵaryp jatyr. Buǵan deıin 20 jyl boıy Reseıdiń avtomobıl ónerkásibi qarqyndy damyp kelgen edi.
Atap aıtqanda, 2019 jylǵa deıin Qazaqstanda jańa avtokólik ımportynyń jalpy kóleminde RF úlesi 50 paıyzdan astam bolsa, 2020-2021 jyldary Reseı úlesi 40 paıyz shamasynda qalyptasty. Al bıylǵy qańtar-sáýirde bul kórsetkish 32,2 paıyzǵa deıin tómendedi.
Reseıde óndiristiń ýaqytsha toqtaýy men avtokontsernderdiń naryqtan ketýi Qazaqstannyń da avtokólik naryǵyna yqpal etip otyr. 2022- jyldyń qańtar-maýsymynda RF-ten Qazaqstanǵa ımporttalatyn kólik sany 5,4 myń shamasynda qalyptasyp, byltyrǵy osy kezeńmen salystarǵanda 2,4 ese kem boldy.
«Renault brendiniń avtokólikterin ımporttaý bir jylda 7,6 ese, Mazda — 2,8 ese, Toyota — 2,6 ese, Volkswagen — 2,1 ese, Mitsubishi — 2,1 ese, Nissan 42,4 paıyzǵa azaıǵan, al Skoda markasynyń kólikteri atalǵan kezeńde elimizge múldem jetkizilmedi. Tek Haval brendi boıynsha Reseıden ımport artqan», - dep atalyp ótken Finprom.kz aqparatynda.
Degenmen, logıstıkalyq daǵdarys pen bólshekter tapshylyǵyna qaramastan, Qazaqstanda jańa kólikterdiń saýdasy tek 8 paıyzǵa qysqarǵan. Bıyl qańtar-maýsymda 51,9 myń jeńil kólik satyldy. Bul turǵyda otandyq zaýattarda qurastyralatyn kólikterdiń úlesi artqan, ıaǵnı 62,7 paıyzdan 75,9 paıyzǵa deıin jetti.
Aıta keteıik, osyǵan deıin Reseıden Qazaqstanǵa kólikten bólek, Lada, Kia, Hyundai, Renault markalarynyń, sondaı-aq GAZ, KAMAZ, URAL kólikteriniń bólshekteri jetkizilip keldi.
Qalyptasqan ahýaldy eskere otyryp, Qazaqstan aldynda taǵy bir syn-qater bolýy múmkin. Bul rette RF-ke elimizden jańa avtokólikter shyǵarylýy yqtımal. Reseılik aqparat keńistiginde Qazaqstannan avtokólik alyp kelýge qatysty málimetter kún saıyn kóbeıip keledi. Bul is-sharalar boıynsha reseılikterge Qazaqstandaǵy alypsatarlar kómektesip jatyr.
