Reseıdiń aýyr atletıka federatsııasy Qazaqstan halqynan keshirim surady
ASTANA. QazAqparat - Groznyı qalasynda ótken RF Prezıdenti Kýbogy úshin saıysta qazaqstandyq aýyr atletshiler Ilıa Ilın men Aleksandr Zaıchıkovty marapattaý kezinde Qazaqstannyń eski ánurany shyrqalǵan bolatyn.
Reseıdiń aýyr atletıka federatsııasy QR Mádenıet jáne sport mınıstri Arystanbek Muhamedıulynyń atyna hat joldap, onda atalǵan jaıtqa qatysty búkil Qazaqstan halqynyń aldynda keshirim suraıtyndaryn jetkizdi, dep habarlaıdy sports.kz. Eske salaıyq, 13 jeltoqsan kúni Groznyı qalasynda ótken aýyr atletıka boıynsha Reseı Federatsııasy Prezıdentiniń Kýbogy úshin besinshi halyqaralyq týrnırde erler arasyndaǵy 105 kelige deıin salmaqta baq synaǵan Ilıa Ilın 2 márte álem rekordyn jańartyp, jeńimpaz atanǵan bolatyn. Taǵy bir sportshymyz Aleksandr Zaıchıkov kúmis medal ıelengen edi. Jeńimpazdardy ulyqtaý rásiminde Qazaqstannyń eski ánurany oınalǵanyn ańǵaryp qalǵan Ilıa jarysty uıymdastyrýshylar men marapattaýǵa shyqqan azamattarǵa bul eski ánuran ekenin aıtty. Keıin elimizdiń jańa ánurany shyrqaldy.
