Reseıdiń áskerı teńiz flotyna delfınder men sý mysyqtary qabyldandy
ALMATY. QazAqparat - Delfınder men sý mysyqtary Reseıdiń áskerı teńiz flotynyń jaýyngeri qataryna qabyldandy. Endigi kezekte olar sý túbine batyp ketken zattar men áskerı tehnıkany taýyp, áskerı súńgýirlerdi anyqtaıtyn bolady. Bul týraly "RIA Novostı" habarlady.
Sevastopol memlekettik okeanarıýmyndaǵy súńgýir janýarlar Reseı flotynyń múddesine sáıkes jańa baǵdarlama boıynsha jattyǵatyn bolady. Buryn afalın-delfınder keńestik baǵdarlama boıynsha Ýkraına áskerı teńiz floty úshin daıarlanatyn.
«Okeanarıým ınjenerleri delfınderdiń sý astynda qyzmet etýi úshin jańa qurylǵylar men jańa ádister paıdalanylatyn bolady. Ýkraına ÁTF-da mundaı tehnıka joq bolatyn. Sol úshin kóptegen jobalardy jabýǵa týra keldi», - dep málimdedi okeanarıým qyzmetkerleri.
Olardyń aıtýynsha, delfınderdiń áskerı jaraqtary ábden eskirgen eken.
Qazirgi tańda álemde áskerı delfınderdi paıdalanatyn 2 baza bar. Olardyń biri - osy Sevastopol bolsa, ekinshisi - AQSh-tyń «San-Dıego» áskerı bazasy.
