Reseıdiń Almatydaǵy Bas konsýly: Barshaǵa ortaq zulymdyqpen taǵy da betpe-bet kezdestik
ALMATY. QazAqparat - Reseı Federatsııasynyń Bas konsýly Alekseı Demın Sankt-Peterbýrg qalasynda bolǵan terakti kezinde qaza tapqandar men zardap shekkenderdiń qaıǵysyna ortaqtasqan qazaqstandyqtarǵa, almatylyqtarǵa alǵysyn bildirdi, dep habarlaıdy QazAqparat tilshisi.
«Sankt-Peterbýrg qalasynda bolǵan qanquıly terrorlyq aktide qaza tapqandar úshin shyn júregimen qaıǵyryp, qazamyzǵa ortaqtasqan qazaqstandyqtarǵa, almatylyqtarǵa alǵysymyzdy aıtamyz. Sońǵy málimet boıynsha, 14 adam qaza taýyp, 8 adam aýyr jaǵdaıda jatyr. Aýrýhanalarda 45-ten astam adam bar. Zardap shekkender arasynda ózge elderdiń de azamattary bar. Reseı Federatsııasynyń 17 aımaǵynyń turǵyndary terakt qurbany boldy», - degen Bas konsýl lańkestiktiń barshaǵa ortaq zulymdyq ekenin aıtty.
«Biz, barshaǵa ortaq zulymdyqpen taǵy da betpe-bet kezdesip otyrmyz. Byltyr Qazaqstanda, Almaty men Aqtóbede bolǵan terorlyq jaǵdaılardy barshańyz bilesizder.
Prezıdent: «terrorıstik oqıǵalar boıynsha kináliler, atap aıtqanda oryndaýshylar, tapsyrys berýshiler, tabylmaı qalǵan bir de bir jaǵdaı bolǵan joq» dep aıtqan bolatyn. Sondyqtan, biz olar laıyqty jazasyn alady dep senemiz», -dedi Alekseı Demın.
Aıta keteıik, búgin almatylyqtar Sankt-Peterbýrg qalasynda bolǵan teraktige baılanysty qaza tapqandar men japa shekkenderderdiń qaıǵysyna ortaqtasyp, Reseı Federatsııasynyń Bas konsýldyǵynyń aldyna gúl shoqtaryn qoıdy .
