Reseıdiń 6 qalasynda qazaqstandyq ónimder tanystyryldy

ASTANA. QazAqparat - Reseı Federatsııasynda óńirlik saýda jelilerinde qazaqstandyq ónimderdi tanystyrýǵa baǵyttalǵan aktsııa ótti, dep habarlaıdy QazAqparat «KAZNEX INVEST» kompanııasyna silteme jasap.

«Bul ázirshe tájirıbe retinde qazaqstandyq óndirýshilermen birge ótkizilgen joba. Onyń basty maqsaty - qazaqstandyq ónimdi Reseıdegi satyp alýshylarǵa keńinen tanystyrý», - dep atap ótti «KAZNEX INVEST» basqarýshy dırektory Jálel Bolatov.

Onyń aıtýynsha, qazaqstandyq taýarlar reseılik tutynýshylar úshin tańsyq emes, degenmen, rıteıl jelileriniń sórelerine shyǵýǵa birshama qıyndyqtar bolǵandyqtan, reseılik tutynýshylarǵa jetpeı jatady.

Aktsııa barysynda shamamen 40-qa tarta taýar túri usynyldy. Onyń ishinde - kondıterlik ónimder, shokolad, un ónimderi, makaron, shyryn men sýsyndar, maı ónimderi bar.

Atalmysh shara Reseıdiń alty qalasynda - Novosibir, Ekaterınbýrg, Barnaýl, Kemerovo, Tomsk jáne Novokýznetskte bir ýaqytta ótti. Bul shamamen 900-den astam saýda núktesi. Qazaqstanda shyǵarylǵan taýarlardy dúken sórelerine jyljytý baǵdarlamasynyń arqasynda QR taýarlary Reseıdiń jetekshi óńirlik jelilerine kire aldy.

Jálel Bolatovtyń habarlaýynsha, shara bıyl jalǵasyn tabady jáne bul qazaqstandyq taýarlardyń Reseıde kóp tanymal bolýyna yqpal etpek.