Reseıdiń 5 qalasynda saılaý bólimsheleri ashylady
ASTANA. QazAqparat - 20 naýryz kúni Reseıdiń 5 qalasynda saılaý bólimshesi ashylady.
Qazaqstan azamattary Máskeý, Sankt-Peterbýrg, Qazan, Astrahan jáne Omby qalasynda Májilis saılaýyndaǵy alty saıası partııanyń birin tańdap, daýys bere alady. Bul týraly Reseıdegi Qazaqstan keńesshi elshisi Marat Syzdyqov málimdedi.
Dıplomat Reseı aqparattyq quraldaryn daýys berý barysyn baıandaýda belsendilik tanytýǵa shaqyryp, tilshilerdiń tirkelý erejesin túsindirdi. Parlament Májilisi saılaýynyń júrgizilý barysyn baqylaý úshin halyqaralyq baqylaýshylardy qosqanda 700-ge jýyq adam tirkeledi dep josparlanýda.
«Buqaralyq aqparat quraldary úmitkerler men saıası partııalar týraly tolyq ári naqty aqparattar taratýy kerek. Qazaqstan halqy Assambleıasynan depýtattyqa úmitkerlerdi tańdaý negizgi saılaýdan bir kúnnen keıin, ıaǵnı 21 naýryzda ótkiziledi. Saılaýdyń osyndaı da arnaıy júıesi bar. Búginde mundaı júıe eshbir elde qoldanylmaıdy», - deıdi Reseıdegi Qazaqstan elshiliginiń keńesshi elshisi Marat Syzdyqov.
Al baqylaýshy retinde tirkelý 14 naýryzǵa deıin jalǵasady, dep habarlady 24.kz. Sonymen qatar buqaralyq aqparat quraldarynyń ókilderi Qazaqstan halqy Assambleıasynan Májilis depýtattyǵyna úmitkerler tizimimen de tanysty.
