Reseıdiń 17 myńǵa jýyq azamaty Qazaqstanda ýaqytsha turýǵa ruqsat aldy

NUR-SULTAN. QazAqparat – Reseı Federatsııalsynyń 16 837 azamaty elimizde ýaqytsha turý úshin ruqsat aldy. Olardyń kóbisi Qyzylorda oblysyna keldi, dep habarlaıdy QazAqparat tilshisi Іshki ister mınıstrligine silteme jasap.

«Bıyl qańtardan naýryzǵa deıin Reseıdiń 16 837 azamaty Qazaqstanda ýaqytsha turýǵa ruqsat aldy. Reseılikterdiń deni Qyzylorda oblysyna keldi. Sondaı-aq, Almatyǵa – 2 116, BQO – 1 677 jáne Qostanaı oblysyna 1 525 reseılik ornalasty», - delingen habarlamada.

ІІM taratqan málimetke sáıkes, Reseı Federatsııasy azamattarynyń negizgi bóligi (8 217) eńbek etý úshin kelip otyr.

Eske sala ketsek, buǵan deıin Reseıden - 170, Ýkraınadan 7 adam Qazaqstan azamattyǵyn alýǵa ótinish bergeni aıtyldy. Odan bólek, Reseıden kelgen 48 azamat pen 10 ýkraınalyq Nur-Sultan qalasynda turýǵa nıet bildirgeni belgili boldy.