Reseıden jetkizilgen 22 tonna bıdaı kebegi keri qaıtaryldy
ASTANA. KAZINFORM — Veterınarııalyq baqylaý beketterinde bıdaı kebegin tasymaldaý kezinde zań buzý anyqtaldy.
Qazaqstanda veterınarııalyq baqylaýǵa jatatyn júkterdiń tasymalyna baqylaý kúsheıtilgen rejımde jalǵasýda. «Syrym» jáne «Shaǵan» veterınarııalyq baqylaý beketterinde júk kólikterin tekserý barysynda eki derek boıynsha veterınarııalyq-sanıtarııalyq talaptardyń buzylǵany anyqtaldy.
— «Syrym» veterınarııalyq baqylaý beketi ınspektorlary Reseı Federatsııasynyń Samara oblysynan Túrkistan oblysynyń Báıdibek aýdanyna 22 tonna bıdaı kebegin jetkizýge bara jatqan júk kóligin tekserdi.
Tekserý barysynda, AShM Veterınarııalyq baqylaý jáne qadaǵalaý komıtetiniń Batys Qazaqstan oblystyq aýmaqtyq ınspektsııasynyń qyzmetkerleri óńirdiń fıtosanıtarııalyq ınspektorlarymen birlesip, úsh birdeı zań buzý anyqtady, — delingen habarlamada.
Atap aıtqanda, júkke arnalǵan veterınarııalyq ilespe qujattar men tańbalaý bolmaǵan. Sonymen qatar ónimdi mindetti termııalyq óńdeýden ótkizý talaby da oryndalmaǵan.
Nátıjesinde júk keri qaıtarylyp, kólik júrgizýshisine qatysty Qazaqstan Respýblıkasynyń Ákimshilik quqyq buzý týraly kodeksiniń 406-baby boıynsha ákimshilik hattama toltyrylyp, aıyppul salyndy.
«Shaǵan» veterınarııalyq baqylaý beketinde de Atyraý oblysynan Reseı Federatsııasynyń Ýfa qalasyna balyq ónimderin tasymaldaýshy kólikti tekserý kezinde veterınarııalyq ilespe qujattardyń joqtyǵy belgili boldy. Osyǵan baılanysty kólik quraly da sol elge keri qaıtaryldy.
Tasymaldaýshylarǵa Keden odaǵy komıssııasynyń 2010 jylǵy 18 maýsymdaǵy № 317 «Eýrazııalyq ekonomıkalyq odaqta veterınarııalyq-sanıtarııalyq sharalardy qoldaný týraly» sheshiminde kózdelgen mindetti veterınarııalyq-sanıtarııalyq talaptar túsindirildi.
Jyl basynan beri óńirdiń veterınarııalyq qyzmeti veterınarııalyq-sanıtarııalyq talaptardyń saqtalmaýyna qatysty 290 derek anyqtalyp, 290 kóliktiń barlyǵy keri qaıtaryldy. Sondaı-aq 145 tulǵaǵa qatysty ákimshilik hattama toltyryldy.
Aıta ketelik Astanada fıtosanıtarııalyq talaptardy buza otyryp ákelingen sándik ósimdikter joıylǵan edi.
