Reseıden jalǵa berilgen jerlerdi qaıtarý halyq kópten kútken áleýmettik mańyzy zor másele - S. Eńsegenov
ASTANA. QazAqparat - Reseıden polıgon úshin jalǵa berilgen jerlerdiń qaıtarylýy - jergilikti jurtshylyq kópten kútken áleýmettik mańyzy zor másele. Búgin Parlament Senatynyń jalpy otyrysynda depýtat Sársenbaı Eńsegenov osylaı málim etti.
Senatordyń aıtýynsha, Reseıge polıgon úshin paıdalanýǵa berilgen jerlerdi qaıtarý - memlekettik turǵydan da, aımaqtyq turǵydan alǵanda da ózekti. Máselen, Reseı urys alańdary men ushý-synaq ortalyǵy úshin paıdalanyp otyrǵan polıgondar Atyraý oblysynyń Aqjar jáne Qyzylqoǵa aýdandary men Inder jáne Taısoıǵan eldi mekenderin qamtıdy.
«Polıgonǵa jalǵa berilgen jerlerdi qaıtarý máselesi - jergilikti jurtshylyq kópten kútken asa ózekti másele bolatyn. Sonyń ishinde Qyzylqoǵa aýdanynyń úshten birin nemese 749 myń 582 gektar jer polıgonǵa berilgen bolatyn. Taısoıǵan aýyly da osy polıgon sheńberinde qalǵan edi. Aýylda 130-dan astam úı 1 myńnan astam adam turady. Biraq jerleri polıgondyq aımaq bolǵandyqtan turǵyndar osy kezge deıin, ıaǵnı 25 jyl boıy turyp jatqan úıleri men jer ýchaskelerin zańdastyra almady. Tipti dúnıege kelgen nárestelerine kýálik alýda da qıyndyq týǵyzyp kelgen edi», dedi senator S. Eńsegenov.
Onyń sózine qaraǵanda, polıgonǵa berilgen Taısoıǵan aýyly aýmaǵynyń 90 paıyzy jaıylymdyq bolsa, 60 paıyzy shabyndyq, ári jerasty sýlaryna da baı. Áıtse de, Reseıge jalǵa berilgendikten aýyl adamdary sharýa qojalyqtaryn qura almaı keldi.
«Mamandardyń esebi boıynsha polıgon jerleri qaıtarylǵannan keıin elýden astam sharýa qojalyqtaryn qurý arqyly keminde otyz myń qoı, on myń bas iri qara, on myń bas jylqy ósirýge múmkindik beredi. Bul jerler paıdaly qazbalarǵa da baı. Munaı men gaz ken oryndary da bar bolǵanymen, kásiporyndar tolyq kólemde jumys isteı almaı kelgen edi. Endeshe, polıgon qaıtarylǵan kezde bul jerlerde birneshe júzdegen adamdy jumyspen qamtıtyn óndiris oryndaryn ashýǵa bolady», dedi senator.
Eske sala keteıik, búgin Parlament Senaty Qazaqstan men Reseı arasyndaǵy 929 Memlekettik ushý-synaq ortalyǵynyń obektileri men jaýyngerlik alańdaryn jaldaý týraly shartqa ózgerister engizý týraly hattamany qabyldanǵan bolatyn. Hattama boıynsha Atyraý jáne Batys Qazaqstan oblystarynyń aýmaǵyndaǵy jalpy alańy 500 myń gektardan astam polıgon ýchaskeleri jaldaýdan shyǵarylady. Jalǵa berilýden shyǵarylatyn ýchaskelerde paıdaly qazbalardy óndirý boıynsha jobalar iske asyrylady. Máselen, Atyraý oblysyndaǵy «Taısoıǵan» ýchaskesinde, Ýaz jáne Qondybaı ken oryndarynda kómirsýtekti óńdeý, sondaı-aq Batys Qazaqstan oblysynyń «Jamantaý» ýchaskesinde qıyrshyq tasty óndirý jobalary júzege asyrylady.
