Reseıden vırýs juqtyryp kelgen Jetisaı turǵyny saýyǵyp, úıine shyqty
TÚRKІSTAN. QazAqparat - 13 mamyr kúngi aqparat boıynsha Túrkistan oblysynda taǵy 2 naýqas koronavırýs ınfektsııasynan jazyldy, dep habarlaıdy QazAqparat oblys ákiminiń baspasóz qyzmetine silteme jasap.
Atakent kentiniń 1992 jylǵy turǵyny - júk kóliginiń júrgizýshisi. 26 sáýir kúni Qazan qalasynan oralǵan. Aıtýynsha, Qazan qalasynan Atakentke deıin jalǵyz ózi kelgen. Dál sol kúni dereý Atakenttegi observatsııalyq ortalyqqa jatqyzylyp, dárigerler baqylaýyna alynǵan. Taldama qorytyndysy onyń COVID-19 ınfektsııasyna shaldyqqanyn anyqtaǵan. Naýqas shuǵyl túrde Jetisaı aýdandyq juqpaly aýrýlar aýrýhanasyna jatqyzyldy. Eki aptadan astam ýaqyt em qabyldaǵan. Búgin saýyǵyp, úıine oraldy.
Koronavırýs ınfektsııasynan jazylǵan kelesi azamat - Maqtaaral aýdany Myrzakent eldi mekeniniń 1995 jylǵy turǵyny. Ol 25 sáýir kúni Atyraý – Shymkent baǵytyndaǵy ushaqpen kelgen. Áýejaıdan medıtsınalyq jedel járdem kóligimen tikeleı Atakenttegi observatsııalyq ortalyqqa jetkizilgen. Synama qorytyndysy Covid-19 ınfektsııasyn juqtyrǵanyn rastap, Jetisaı aýdandyq juqpaly aýrýlar aýrýhanasyna jatqyzylǵan. 13 mamyrdaǵy taldama qorytyndysy teris nátıjesin kórsetip, indetten jazylǵan azamat aýrýhanadan shyǵaryldy.
Jalpy Túrkistan oblysy boıynsha koronavırýs ınfektsııasynan jazylǵan azamattar sany 114-ke jetti.
