Reseıden SQO-ǵa saparlaıtyn týrıster sany artty - Qumar Aqsaqalov
PETROPAVL. QazAqparat - Sońǵy eki jylda Soltústik Qazaqstan oblysyna Reseıden saparlaıtyn týrıster sany eki esege artty. Bul týraly Qazaqstan men Reseıdiń Óńiraralyq yntymaqtastyǵynyń XV forýmynda Soltústik Qazaqstan oblysynyń ákimi Qumar Aqsaqalov málim etti, dep habarlaıdy QazAqparat.
«Nursultan Ábishuly, Sizdiń tapsyrmańyz boıynsha Imantaý-Shalqar kýrort aımaǵyn damytýǵa arnalǵan keshendi jospar ázirlenip jatyr. Osy oraıda Astana men Reseı óńirleri baǵytyndaǵy joldarǵa kúrdeli jóndeý jumystaryn júrgizýge ekpin qoıylyp otyr. Kóliktik ınfraqurylymdy jaqsartýdyń arqasynda týrısterdiń jolda júrý ýaqyty 30 paıyzǵa qysqardy», - dedi oblys
Onyń sózine qaraǵanda, sońǵy eki jylda osy salada qabyldanǵan sharalardyń nátıjesinde Reseıden Soltústik Qazaqstan oblysyna saparlaıtyn týrıster sany eki esege artqan.
«Aldaǵy jyly bul kórsetkish taǵy da ósedi dep boljanýda. Sáıkesinshe, shekara beketterine júkteme artady. Ásirese, jaz kezinde shekarada uzyn-sonar kezekti baıqaımyz. Sondyqtan shekaradaǵy beketterden ótetinderdi baqylaý rásimin jeńildetý múmkindigin qarastyrýdy usynamyz», - dedi Q. Aqsaqalov.
Sonymen qatar óńir basshysy Imantaý-Shalqar aýmaǵyn jáne ózge de jobalardy damytýǵa nıetti ınvestorlarǵa qoldaý jasalatynyn tilge tıek etti. Bıznesti qoldaý aıasynda týrızm nysandaryna barlyq qajetti ınjenerlik kommýnıkatsııalar tartylatyn bolady.
Budan buryn habarlanǵandaı, Qazaqstan men Reseıdiń Óńiraralyq yntymaqtastyǵynyń XV forýmynda QR Mádenıet jáne sport mınıstri Arystanbek Muhamedıuly eki eldiń týrızm salasyn damytýdyń múmkindikterin baıandady.
Sonymen qatar onda Aqtaý sammıti Kaspıı teńizindegi týrızmdi damytýǵa yqpal etkendigi aıtyldy.
Aıta keteıik, búging forým «Qazaqstan men Reseıdegi týrızmdi damytýdyń jańa joldary men úrdisteri» taqyrybynda ótip jatyr.
