Reseıden Pavlodarǵa qonaqqa kelgen er adam Ertis ózeninde joǵalyp ketti
PAVLODAR. KAZINFORM - Pavlodar oblysynyń tótenshe jaǵdaı qyzmeti jigittiń 28 mamyr kúni tańerteńgi ýaqytta joǵalyp ketkenin habarlady. Ol ózen jaǵalaýyna bir top serikterimen kelip, spırttik ishimdik ishken.
Qutqarýshylardyń málimetinshe, 36 jastaǵy er adam Pavlodarǵa Reseıden qonaqqa kelgen. Janyndaǵy joldastarymen birge serýendep, spırttik ishimdik ishken. Al túngi saǵat 3-ke taman ishimdikke sylqııa toıyp alǵan kóńildi top Lýgovaıa kóshesi aýmaǵyndaǵy Ertis jaǵalaýynan bir-aq shyqqan. Sheteldik azamat sýǵa shomylýdy jón kórgen.
– 1990 jylǵy jigit Qazaqstan azamaty emes, Reseıden qonaqqa kelgen. Shamamen tańǵy saǵat 5-ke qaraı sýǵa kirip, shomylyp shyqqan. Odan soń joldastarymen birge qaıtadan ishimdik ishken. Keıin sýǵa ekinshi ret baryp túsken. Alaıda bul joly qaıta shyqpaǵan. Qazirgi ýaqytta izdestirý jumystary júrgizilip jatyr, – dep habarlady Pavlodar oblysy tótenshe jaǵdaılar departamentiniń basqarma bastyǵy Tilekjan Galıamov.
Qutqarýshylar qazirgi ýaqytta Ertistegi sýdyń temperatýrasy 13-14 gradýs jyly ekenin atap ótti.
Sheteldik azamatpen birge ishimdik ishken jigitter polıtsııa bólimshesine jetkizilgen. Qoǵamdyq orynda spırttik ishimdik ishkeni úshin árqaısysyna 22 myń teńgeden aıyppul salynǵan.
Eske sala keteıik, jazda Pavlodar oblysynda 45 jaǵajaı resmı túrde jumys isteıtin bolady.
