Reseıden Oralǵa qurt túsken kartop ákelingen
ORAL. QazAqparat - 8 qarasha kúni QR AShM Agroónerkásiptik keshendegi memlekettik ınspektsııa komıteti BQO ósimdikter karantıni jónindegi memlekettik ınspektorlary Reseıdiń Nıjegorod oblysynan Oralǵa avtokólikpen ákelingen salmaǵy 20 tonna kartopty tekserip qarady, dep habarlaıdy «QazAqparat» tilshisi.
QR AShM baspasóz qyzmetinen túsken málimetke qaraǵanda, tekserý nátıjesinde kartoptyń altyn tústes jumyr qurtpen zaqymdanǵany anyqtaldy. Bul derek 2017 jylǵy 6 qarashadaǵy №220 karantındik fıtosanıtarııalyq saraptama qorytyndysymen rastaldy.
Qazaqstan Respýblıkasy jáne Eýrazııalyq ekonomıkalyq odaǵynyń ósimdikter karantıni salasyndaǵy zańnamasyna sáıkes zaqymdalǵan kartop RF aýmaǵyna keri qaıtaryldy.
Aıta keteıik, kartoptyń altyn tústes jumyr qurty ósimdikterdi jaramsyz kúıge túsirip, ónim shyǵynynyń 20-80 paıyzǵa deıin jetýine ákeledi. Oǵan qosa topyraqta 10 jylǵa deıin saqtalyp, jaramdy kartop alqabynyń qysqarýyna soqtyrýy yqtımal.
