Reseıden munaı ónimderin ımporttaý: kelisim 2028 jylǵa deıin uzartylady

ASTANA. KAZINFORM — Parlament Májilisiniń qaraýyna «2010 jylǵy 9 jeltoqsandaǵy QR Úkimeti men RF Úkimeti arasyndaǵy Qazaqstanǵa munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimniń qoldanylýyn qaıta bastaý jáne oǵan ózgerister engizý týraly hattamany ratıfıkatsııalaý týraly» zań jobasy engizildi.

- Atalǵan hattamaǵa 2024 jylǵy 27 qarashada Astana qalasynda qol qoıyldy. Kelisim aıasynda reseılik munaı ónimderin bajsyz jetkizý múmkindigi eskerilgen. Bul rette Qazaqstan Respýblıkasynyń ishki naryǵyn qajetti otyn kólemimen turaqty qamtamasyz etýge yqpal etedi, - dedi depýtat Edil Jańbyrshın Májilistiń jalpy otyrysynda.

Onyń aıtýynsha, Qazaqstan men Reseıdiń energetıka mınıstrlikteri arasynda kelisilgen ındıkatıvti balansqa sáıkes, munaı ónimderin ımporttaý, sondaı-aq osy kelisimdi 2028 jylǵy 1 qańtarǵa deıin uzartý kózdelgen.

- Atap aıtqanda, Májilistiń Ekologııa máseleleri jáne tabıǵat paıdalaný komıteti zań jobasy boıynsha qorytyndy ázirleýge daıyn, - dedi depýtat.

Budan buryn habarlanǵandaı, 2025 jyldyń qorytyndysy boıynsha Qazaqstanda 13,7 mln tonna munaı ónimderin óndirý josparlanǵan.