Reseıden munaı ónimderin baj salyǵynsyz ımporttaýdy kózdeıtin zań jobasy ázirlendi
ASTANA. KAZINFORM – Ashyq normatıvtik-quqyqtyq aktiler portalynda «Qazaqstan men Reseı Úkimetteri arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimniń qoldanylýyn qaıta bastaý jáne oǵan ózgerister engizý týraly hattamasyn ratıfıkatsııalaý týraly» Zańnyń jobasy jarııalandy.
Zań jobasyn ázirlegen elimizdiń Energetıka mınıstrligi Qazaqstan Úkimeti men Reseı Úkimeti arasyndaǵy munaı men munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimdi qaıta jańǵyrtý jónindegi hattamaǵa 2024 jylǵy 27 qarashada Astana qalasynda qol qoıylǵanyn atap ótedi.
- 2010 jyldan bastap qoldanysta bolǵan kelisim reseılik munaı ónimderin bajsyz ımporttaýǵa múmkindik beredi. Bul Qazaqstannyń ishki naryǵynyń turaqtylyǵyn qamtamasyz etý úshin mańyzdy qadam sanalady. 2025 jylǵa arnalǵan Indıkatıvtik balans aıasynda 285 myń tonna avtobenzın, 300 myń tonna avıaotyn, 450 myń tonna dızel otyny jáne tutyný sharyqtaý kezeńderinde 500 myń tonna bıtým ımporttaý josparlanǵan, - dep atap ótedi mınıstrlikten.
Vedomstvo málimetinshe, osy halyqaralyq shartqa qatysty zań jobasyn ratıfıkatsııalaý Qazaqstan Respýblıkasynyń strategııalyq jáne baǵdarlamalyq qujattarynyń basym baǵyttaryna sáıkes keletin bolady. Energetıka mınıstrligi bul sheshim táýekelderdi belsendi basqarýǵa múmkindik beretinin jáne kásiporyndardyń senimdi jumys isteýin, sondaı-aq salanyń turaqty damýyn qamtamasyz etetinin atap kórsetedi.
Atalǵan joba qabyldanǵan jaǵdaıda áleýmettik-ekonomıkalyq jáne quqyqtyq jaǵymsyz saldarǵa alyp kelmeıdi jáne ulttyq qaýipsizdikke áser etpeıdi.
Esterińizge sala ketsek, osy jyldyń 29 naýryzynan bastap Qazaqstan aýmaǵynan munaı ónimderiniń jekelegen túrlerin áketýge alty aı merzimge tyıym salynǵan edi.