Reseıden kólik urlaǵan almatylyq Pavlodarda ustaldy

Pavlodar oblystyq polıtsııa departamentiniń baspasóz qyzmetiniń málimetinshe, 26 tamyz kúni saǵat 15.00-de Pavlodar oblysynyń polıtsııasyna Reseı Federatsııasy Novosibir qalasynda urlanǵan «Toıota Kamrı» markaly avtokóligin izdeýge kómek kórsetý týraly habarlama kelip túsken.
- Habarlamany alǵannan keıin jedel túrde atalǵan avtomashınanyń bizdiń shekaradan ótip, «Pavlodar – Nur-sultan»tas jolymen júrgeni anyqtaldy. Aqparat osy avtojol ýchaskesinde jol qaýipsizdigin júzege asyratyn patrýldik polıtsııa rotasynyń barlyq beketterine taratyldy. Biraz ýaqyttan keıin atalǵan avtokólik Ekibastuz aýyldyq aımaǵynyń Baıet aýyly mańyndaǵy Shiderti kenti baǵytyndaǵy tas jolda kózge tústi. Alaıda júrgizýshi polıtsııa qyzmetkerleriniń toqtaý týraly nusqaýyna baǵynbady, - dedi oblystyq polıtsııa departamenti bastyǵynyń birinshi orynbasary Jasqaırat Qaıyrov.

Patrýldik polıtsııa rotasynyń ınspektorlary Sábıt Estaı, Beısembaev Amanjol, Bazarbekov Ashat, Vereşak Rýslan jáne Júsipov Nurlan bastatqan avtopatrýlder kúdiktiniń izine túsken. Nátıjesinde, «Toıota Kamrı» markaly avtokóligin tizgindegen 1990 jyly týǵan er adam Shiderti kentiniń janarmaı quıý stantsııasynda ustaldy. Belgili bolǵandaı, azamat Almaty qalasynyń turǵyny bolyp shyqty. Er adamnyń qujattary bolmaǵan.
Polıtsııa jol erejesin buzǵany úshin júrgizýshige qatysty birqatar ákimshilik materıaldar qozǵalǵanyn atap ótti.
Avtokólik aıyp turaǵyna qoıyldy.
Shekara mańyndaǵy yntymaqtastyq sheńberinde ustaý týraly aqparat izdestirý bastamashysyna habarlandy. Avtokólik pen materıaldar Reseı ІІM-ne beriletin bolady.