Reseıden Keıki batyrdyń basyn qaıtarýǵa kúsh salý kerek - S. Aqylbaı
ASTANA. QazAqparat - Reseıden Keıki batyrdyń basyn qaıtaratyn kez jetti. Búgin Parlament Senatynyń jalpy otyrysynda senator Serik Aqylbaı osy máseleni kóterdi.
«Táýelsizdiktiń bıylǵy 25 jyldyǵy Qazaq halqynyń ult-azattyq kóterilisiniń 100 jyldyǵymen tuspa-tus kelip otyr. Patshalyq Reseıdiń otarlaý saıasatyna qarsy kóterilis Qazaqstannyń barlyq aımaqtaryn túgeldeı qamtydy. Patsha úkimeti qazaq halqynyń bul kóterilisin basyp-janshý úshin barlyq kúsh-jigerin aıamady. Jetisý, Syrdarııa, Semeı, Batys Qazaqstan óńirlerindegi kóterilister burq etkende, Torǵaı dalasynda Ábdiǵappar Janbosynuly, Amangeldi Imanov, Keıki batyr bastaǵan kóterilis te eń uzaqqa sozylǵan ult azattyq qozǵalysynyń biri boldy», - deıdi senator.
Onyń aıtýynsha, Torǵaı kóterilisi qazaq halqynyń tarıhynda erekshe oryn alady. Bul rette depýtat Máńgilik Eldiń rýhy myqty, otansúıgish urpaǵyn tárbıeleýde uly dala batyrlaryn dáripteýdiń mańyzy zor ekenin atap ótti.
«Alaıda, búgingi urpaq 1916 jyly bolǵan kóterilis týraly, ony uıymdastyrýshy batyrlar jaıynda tolyq bile bermeıdi. Keshegi keńestik kezeńde de bul kóterilis týraly shyndyq tolyq aıtylǵan emes. Endi osy olqylyqtyń ornyn toltyratyn kez keldi. Osy kóterilistiń dańqty qolbasshylarynyń biri, ataqty mergen Keıki batyr óz eli úshin basyn báıgege tikkendigi belgili. Batyrdy qyzyl ásker aıýandyqpen óltirip, eki qoly men basyn kesip alǵan. Batyr babamyzdyń basy áli kúnge Sank-Peterborda saqtaýly tur. Buny QR Syrtqy ister mınıstrliginiń suraýyna oraı 1995 jyly Reseı Syrtqy ister mınıstrligi de jaýap hatynda rastalǵan. Jalpy Keıki batyrdyń bas súıegin týǵan eline aldyrý máselesi kópten aıtylsa da nátıje shyqqan emes. Degenmen, Ult-azattyq kóterilistiń júz jyldyǵyna oraı batyrdyń basyn qaıtaryp, týǵan jerine jerleý máselesin Úkimet qolǵa alsa ıgi», - dedi S. Aqylbaı.
