Reseıden ken orny men jol qurylysyna qatysty alaıaqtyq jasaǵan kúdikti elge jetkizdi
ASTANA. KAZINFORM — Bas prokýratýra qylmystyq jaýaptylyqqa tartý maqsatynda asa iri mólsherde alaıaqtyq jasaǵany úshin Qazaqstan Respýblıkasynyń azamatyn Reseıden ekstradıtsııalandy.
Tergeý barysynda 2019 jyldyń aqpanynda, kúdikti aldaý jolymen Aqmola oblysynda ornalasqan ken ornynda quramynda altyny bar kendi óndirýge arnalǵan kelisimshart jasasýǵa járdem kórsetý syltaýymen úsh azamattyń 500 myń AQSh dollary mólsherindegi aqshalaı qarajatyn ıemdengeni anyqtaldy.
Sonymen qatar, 2021 jyly ol eki kásipkerdi «QazAvtoJol» UK» AQ-men jol-qurylys jumystarymen baılanysty kelisimshart jasasýǵa járdem kórsetý syltaýymen oǵan 93,4 mln teńge berýge kóndirgen.
Qylmystyq quqyq buzýshylyq jasaǵannan keıin kúdikti jasyrynǵan bolatyn jáne osyǵan baılanysty oǵan halyqaralyq izdeý jarııalandy.
— Ótken jyldyń qyrkúıek aıynda ol Reseı Federatsııasynyń Máskeý qalasynda ustalyp, QR Bas prokýratýrasynyń suraýy boıynsha Otanyna ekstradıtsııalandy. Qazir kúdikti tergeý ızolıatoryna qamaldy. Taǵylǵan aıyptar úshin múlikti tárkileı otyryp, 5 jyldan 10 jylǵa deıingi merzimge bas bostandyǵynan aıyrý, belgili bir laýazymdardy atqarý nemese belgili bir qyzmetpen aınalysý quqyǵynan aıyrý ne onsyz jazasy kózdelgen, — delingen habarlamada.
Budan buryn anasyn pyshaqtaǵan kúdikti Vetnamnan ekstradıtsııalanǵanyn jazǵanbyz.
