Reseıden kelgen semeılik stýdent qyzdan koronavırýs anyqtaldy
SEMEI. QazAqparat – Semeıge Reseı Federatsııasynan kelgen 19 jastaǵy stýdent qyzdan COVID-19 vırýsy anyqtaldy, dep habarlaıdy QazAqparat Úkimeti janyndaǵy Qazaqstanda koronavırýstyń taralýyna jol bermeý jónindegi vedostvoaralyq komıssııanyń Telegram paraqshasyna silteme jasap.
20 mamyrdaǵy málimet boıynsha Shyǵys Qazaqstan oblysynda koronavırýs ınfektsııasyn juqtyrǵan 1 adam tirkeldi.
«Reseı Federatsııasymen shekaradaǵy «Aýyl» avtoótkelindegi sanıtarlyq-karantındik beketten ótkende epıdemıolog mamandar sensor termometrmen dene qyzýyn ólshep, saýalnama júrgizgende stýdent qyzdyń densaýlyǵyna shaǵymdanbaǵan. Algorıtmge sáıkes ekspress testileý teris nátıje kórsetken. Avtoótkel mamandary 14 kún úı karantıninde bolý qajettiligi týraly túsindirgen. Semeı qalasyna kelgen soń úı karantınine alynyp, turǵylyqty jeri boıynsha dárigerlerdiń baqylaýynda boldy.
Medıtsına qyzmetkerleri PTR ádisimen qaıtadan tekserý maqsatynda bıologııalyq materıal alyndy. Dıagnostıkalyq zertteý nátıjesi boıynsha COVID-19 anyqtaldy», delingen habarlamada.
Qazirgi ýaqytta patsıent juqpaly aýrýlar statsıonaryna jatqyzyldy jáne tıisti em alyp jatyr.
Aıta keterligi, oblysta koronavırýs juqtyrǵan 59 adam tirkelgen, onyń ishinde 28-i emdelip shyqqan.
