Reseıden keletin sút ónimderinen adam densaýlyǵyna zııandy bakterııalar tabylýda
ASTANA. QazAqparat - Reseıden ákelinetin sút ónimderinen ishek taıaqshalary tobyna jatatyn bakterııalar tabyldy. Bul týraly búgin Halyqaralyq tutynýshylar kúni qarsańynda ótkizilgen baspasóz máslıhatynda «Ádilet» Tutynýshylar quqyǵyn qorǵaý qoǵamdyq birlestiginiń tóraǵasy Tólegen Zakarıanov aıtty.
Onyń málimetinshe, Tutynýshylar quqyǵyn qorǵaý qoǵamdyq birlestigi QR Tutynýshylar quqyǵyn qorǵaý agenttiginiń Astana qalalyq departamentimen birlese otyryp, birqatar sheteldik jáne otandyq ónimderge saraptamalar júrgizgen.
«Saraptama nátıjesinde 8 ónimde mıkrobıologııalyq kórsetkishter boıynsha aýytqýshylyqtar tabyldy. Máselen, Reseıden ákelinetin «Domık v derevne» jáne «Vımm-Bıll-Dann» sútterinen ishek taıaqshalary tobyna jatatyn bakterııalar tabylǵan. Tipti keıbir ónimder kógerip te ketken», - dep atap ótti birlestik tóraǵasy.
Onyń málimetinshe, sonymen qatar, Reseıden ákelinetin irimshik, qoıyltylǵan sút, syr jáne basqa da sút ónimderinen («Lıýbavınka», «Glavprodýkt», «Sıbır velıkaıa» jáne «Shadrınskoe» ónimderi) adam densaýlyǵyna zııandy mıkroaǵzalar kóptep tabylǵan.
