Reseıden Qazaqstanǵa zańsyz ushaq ákele jatqandar ustaldy

OMBY. QazAqparat – Omby kedenshileri Qazaqstanǵa ákele jatqan eki oryndyq jeńil motorly ushaqty tapty. Ushaqty ruqsat qujatynsyz alyp shyqpaq bolǵan, dep habarlaıdy QazAqparat Sibir keden basqarmasynyń resmı saıtyna silteme jasap.

Omby kedenshileri Pavlodar turǵyny satyp alǵan ushaqty shekaradan ótkizbeı qoıǵan.

«Zańbuzýshylyqty Olhovka ótkizý pýnkti aımaǵynda fýrgondy tekserý barysynda kedenniń mobıldi toby anyqtady. Fýrgon tirkemesinen kedenshiler reseılik shaǵyn áýe kemesin tapty. Pavlodardaǵy ıesine jetkizilýi kerek bolǵan ushaqtyń salmaǵy - 300 kg, al quny - 3,4 mıllıon rýbl. Taýardy tasymaldaýshy kedenshilerge qajetti qujattardy kórsete almady», - dep habarlady Sibir keden basqarmasy.

Áýe kemesin áketýge tyıym salyndy. Taýar tıelgen kólik Reseı Federatsııasyna qaıtaryldy.