Reseıden Qazaqstanǵa esirtki zerthanalaryn uıymdastyrǵan kúdikti ekstradıtsııalandy
ASTANA. KAZINFORM – Psıhotroptyq zattardy óndirýmen jáne ótkizýmen aınalysqan qylmystyq toptyń uıymdastyrýshysy Reseı Federatsııasynan ekstradıtsııalandy.
Qazaqstan Respýblıkasynyń Bas prokýratýrasy psıhotroptyq zattardy zańsyz óndirýmen jáne ótkizýmen aınalysqan qylmystyq topty uıymdastyrǵany úshin qylmystyq jaýaptylyqqa tartý maqsatynda Qazaqstan azamatyn Reseı Federatsııasynan ekstradıtsııalady.
Tergeýmen kúdiktiniń Almaty qalasy men Qazaqstannyń basqa da aýmaqtarynda mefedron óndirýmen jáne ótkizýmen aınalysqan uıymdasqan qylmystyq topty qurǵany jáne oǵan basshylyq etkeni anyqtaldy.
2021 jyldan bastap ol aqshalaı qarajatqa muqtaj adamdardy qylmystyq áreketke tartyp otyrǵan. Qatysýshylar psıhotroptyq zattardy óndirý, tasymaldaý, ólshep-oraý jáne taratý boıynsha ártúrli mindetterdi atqarǵan, al olardyń áreketteri Telegram messendjeri arqyly qashyqtan úılestirilgen.
2024 jyly uıymdastyrýshynyń nusqaýy boıynsha Almaty qalasynda birneshe esirtki zerthanasy jabdyqtalǵan. Olardyń birinde psıhotroptyq zattardy óndirý barysynda eki qatysýshy aýyr hımııalyq ýlanýǵa ushyrap, qaıtys bolǵan.
Osyǵan qaramastan, jańa oryndaýshylardy tarta otyryp, qylmystyq áreket jalǵastyrylǵan.
2024 jylǵy 19 qyrkúıekte polıtsııa qyzmetkerleri zerthanalardyń biriniń qyzmetin toqtatty. Tintý barysynda 24 kg-nan astam hımııalyq zattar, jabdyqtar, qorǵanyshquraldary men daıyn ónim tabyldy.
2025 jylǵy shildede kúdikti Reseı Federatsııasynyń aýmaǵynda ustalyp, Qazaqstan Respýblıkasy Bas prokýratýrasynyń suraý salýy boıynsha Elge ekstradıtsııalandy.
Búgingi kúni ol tergeý ızolıatoryna qamaldy.
Oǵan taǵylǵan qylmystardy jasaǵany úshin múlki tárkilenip, 20 jylǵa deıingi merzimge bas bostandyǵynan aıyrý jazasy kózdelgen.
Aıta ketelik shetelden kólik ákelemin dep 106 mln teńgeni ıemdengen kúdikti Reseıden ekstradıtsııalandy.
