Reseıden Qaraǵandyǵa ákelingen qyzanaqtan vırýs anyqtaldy

ASTANA. KAZINFORM — Qaraǵandy oblystyq aýmaqtyq ınspektsııasynyń ósimdikter karantıni jónindegi memlekettik ınspektory karantındik fıtosanıtarııalyq baqylaý jáne qadaǵalaý júrgizý barysynda Reseıden ákelingen qyzanaq tuqymdarynyń 130 qaptamasynan synama aldy, dep habarlaıdy AShM baspasóz qyzmeti.

— «Fıtosanıtarııa» RMK júrgizgen karantındik fıtosanıtarııalyq saraptama qorytyndysy boıynsha zerttelgen úlgilerden karantındik nysandar qataryna jatatyn qyzanaq jemisteriniń qońyr qatparly vırýsy (Tomato brown rugose fruit virus, ToBRFV) anyqtaldy. Ákimshilik is materıaldary Qazaqstannyń qoldanystaǵy zańnamasyna sáıkes protsestik sheshim qabyldaý úshin sotqa joldandy, — delingen mınıstrlik taratqan habarlamada.

Aýyl sharýashylyǵy mınıstrligi syrtqy saýdaǵa qatysýshylarǵa el aýmaǵyna karantınge jatqyzylǵan ónimdi ákelý kezinde ósimdikter karantıni salasyndaǵy zańnama talaptary men fıtosanıtarııalyq normalardy qatań saqtaý qajettigin eske salady.

Vedomstvo atap ótkendeı, baqylaýdyń belgilengen rásimderi men qaýipsizdik talaptaryn saqtaý — agrarlyq sektordy qorǵaýdyń jáne fıtosanıtarııalyq qaýipsizdikti qamtamasyz etýdiń mańyzdy sharty.

Osydan buryn qaýipti vırýspen zalaldanǵan qyzanaq tuqymdary Astana áýejaıynan ótkizilmek bolǵanyn jazǵanbyz.