Reseıden ımporttalatyn benzın eldegi baǵany kótermeı me

Energetıka mınıstrligi eldegi AI-92 markaly benzınniń tapshylyǵyn boldyrmaý úshin Reseıden 110 myń tonna ónim jetkizý týraly kelissóz júrgizip jatyr. Vıtse-mınıstr Erlan Aqkenjenov bul benzın kelse, ishki naryqtaǵy baǵaǵa áseri qandaı bolatynyn aıtty, dep habarlaıdy QazAqparat tilshisi.

«AI-92 markaly benzınniń baǵasyn ózgertýdi josparlap otyrǵan joqpyz. AI-95-tiń de baǵasyn ózgertý josparda joq. Benzın baǵasy týraly jalpy aıtsaq, AI-92-niń baǵasyn memleket retteıdi. Qazir shekti baǵa 1 lıtrge 205 teńgege deıin.
Al AI-95 markaly benzın baǵasyn memleket rettemeıdi. Ony naryq ózi retteıdi. Sondyqtan oıynshylar onyń baǵasyn óz betterimen qoıýǵa haqyly. Biraq bir ólshem bar. Bul – taýardyń ózindik quny. ıAǵnı, baǵa belgileý erejesi boıynsha, Básekelestikti qorǵaý jáne damytý agenttigi baǵany qaraǵan kezde ózindik qun boıynsha baǵalaıdy. Qazaqstanda óndirilgen benzınniń ózindik quny bizge anyq. Ony bizde «QazMunaıgaz» jáne «Petrosun» kompanııalary men onyń enshiles kásiporyndary, ózge de táýelsiz munaı óńdeýshiler shyǵarady», - dedi ol.
Vıtse-mınıstr Reseıden ákelinetin benzınniń baǵasy qandaı bolatynyn aıtýǵa áli erte dep otyr.
«Reseı benzıni týraly aıtqanda onyń jetkizý quny men ózindik qunyn esepteýimiz kerek. Bul jerde kelisimshart bekitilgen kúnge qarap, oǵan bizde salynatyn alym-salyqtardy qosý kerek.
Qazirgi tańda Reseı bırjasynda benzın baǵasy kún saıyn ózgerip tur. Qazir tómendeı bastady. Ózindik qunyn aıtsaq, 390-400 teńge tóńireginde bolýy múmkin. Biraq bul shamalap alǵandaǵy kórsetkish qana. Naqty qatyp qalǵan ólshem emes. Áıtse de, bizge keletin Reseı benzıni ózindik qunynan tómen bolmaıdy. Óıtkeni olardyń ózderiniń satý baǵasy bar. Oǵan bizdiń alym-salyqtar men tasymal shyǵyndaryn qosý kerek.
Degenmen qoldaǵy bar qordy eseptep, Qazaqstan kúzdi janarmaı tapshylyǵynsyz ótkizedi dep úmittenemiz», - degen Erlan Aqkenjenov buǵan deıingi tájirıbeni mysalǵa aldy.
Aıtýynsha, Reseı benzıni Qazaqstan benzıninen qymbat bolǵanyna qaramastan, túgel satylyp ketken kórinedi.
«Gazprom» kompanııasy Almatyǵa ákelgen AI-95 markaly benzınniń baǵasy lıtrine 298 teńge boldy, men qatelespesem. Ol kezde Qazaqstan benzıniniń baǵasy 250 teńge bolǵan. Soǵan qaramastan, Reseı benzıni tolyǵymen satylyp ketti. Óıtkeni olardyń benzınine janarmaı joldaryn tazartatyn qospa qosylǵan. Bul kólikti jaqsy júrgizetin kórinedi.
Qaıtalap aıtam, Qazaqstan benzıniniń baǵasyn kótermeımiz. Mınıstrlik qazirgi baǵa osy kúıinde qalý úshin búkil sharany qabyldady», - dedi mınıstrdiń orynbasary.
Erlan Aqkenjenovtiń sózinshe, AI-95 markaly Reseı benzıni Qazaqstan benzıninen 20 paıyz qymbat bolýy múmkin.
«Reseı benzıniniń baǵasyna aktsız quny men tasymal shyǵyny qosylady. ıAǵnı, jobalap aıtqanda 20 paıyz qymbat bolatyn shyǵar», - dedi ol.