Reseıden et ónimderin ákelýge salynǵan tyıym qashan joıylady
ASTANA. KAZINFORM — Aýyl sharýashylyǵy vıtse-mınıstri Azat Sultanov Reseıden mal men et jetkizýge engizilgen tyıymnyń merzimine qatysty túsinik berdi.
Onyń aıtýynsha, shekteýler Qazaqstanmen shekaralas Reseı óńirlerindegi epızootııalyq jaǵdaıǵa baılanysty engizilgen.
— Biz aqparat aldyq, sonyń ishinde Rosselhoznadzor tarapynan málimet boldy. Osy oraıda Qazaqstan aýmaǵyna qaýipti aýrýdyń taralýyna jol bermeý maqsatynda maldy, et ónimderi men jem-shópti ákelýge shekteýler engizildi, - dedi Azat Sultanov Parlament Májilisinde tilshiler suraǵyna jaýap bere otyryp.
Vıtse-mınıstrdiń sózine qaraǵanda, jaqynda Reseı Federatsııasy Aýyl sharýashylyǵy mınıstriniń sapary barysynda Qazaqstan men Reseı arasyndaǵy ózara shekteýler máselesi talqylandy. Osyǵan uqsas sharalar EAEO-nyń basqa elderinde de qoldanylady.
— Máselen, qandaı da bir qaýip anyqtalsa, mundaı aqparat bizge halyqaralyq uıymynan joldansa, mundaı shekteýlerdi engizemiz. Jalpy, bul qalypty tájirıbe», - dedi ol.
Vıtse-mınıstr eger jaǵdaı turaqtansa jáne belgili bir merzimde aýrýdyń jańa oshaqtary bolmasa, shekteýler tolyǵymen nemese ishinara joıylýy múmkin ekenin aıtty.
— Biz óńirler boıynsha prıntsıpin ustanatyn bolamyz, ıaǵnı aýrý taralmaǵan nemese indet tirkelmegen óńirler ashylady. Óıtkeni bizde aýyl sharýashylyǵy ónimderiniń ózara saýdasy óte belsendi. Bul másele kelesi aıda qaralady», - dedi Azat Sultanov.
Budan buryn habarlanǵandaı, bıyl aqpan aıynda QR AShM Veterınarııalyq baqylaý jáne qadaǵalaý komıteti Reseıdiń birqatar óńirinen mal men et jetkizýge engizilgen tyıymnyń sebebin atady.
