Reseıden elge ákelingen 20 tonna qus eti keri qaıtaryldy
ASTANA. KAZINFORM — BQO-da qus sharýashylyǵy ónimderin ákelý kezinde veterınarııalyq-sanıtarııalyq talaptardyń buzylýy anyqtaldy, dep habarlaıdy AShM Veterınarııalyq baqylaý jáne qadaǵalaý komıtetiniń baspasóz qyzmeti.
«Syrym» veterınarııalyq baqylaý beketinde Samara oblysynan (RF) Qyzylorda oblysyna baǵyt alǵan júk kóligi toqtatylyp, tekserýden ótkizildi. Tekserý barysynda kólikte 20 tonna qus eti tasymaldanǵany anyqtaldy.
— Qujattamalyq tekserý nátıjesinde ónim óndirýshi kásiporyn Eýrazııalyq ekonomıkalyq odaqtyń janýarlardan alynatyn ónimderdi eksporttaýǵa ruqsat etilgen óndirýshiler tizimine engizilmegeni belgili boldy. Anyqtalǵan quqyqbuzýshylyqqa baılanysty júk kóligi shyǵý eline keri qaıtaryldy, al júrgizýshige Qazaqstan Respýblıkasynyń Ákimshilik quqyq buzýshylyq týraly kodeksiniń 406-baby boıynsha ákimshilik hattama toltyrylyp, aıyppul salyndy, — delingen habarlamada.
Sonymen qatar, tasymaldaýshyǵa 2010 jylǵy 18 maýsymdaǵy Eýrazııalyq ekonomıkalyq komıssııanyń № 317 sheshimine sáıkes veterınarııalyq-sanıtarııalyq talaptar túsindirildi.
Bıylǵy jyldyń basynan beri Batys Qazaqstan oblysy aýmaǵynda veterınarııalyq zańnama talaptarynyń 204 buzýshylyǵy anyqtaldy. Nátıjesinde 204 júk kóligi keri qaıtarylyp, 130 ákimshilik hattama toltyryldy. Salynǵan aıyppuldardyń jalpy somasy 11 009 600 teńgeni qurady.
Eske salsaq, osydan buryn veterınarııalyq qujaty joq mal ónimin satqandar qylmystyq jaýapkershilikke tartylýy múmkin ekeni anyqtaldy.