Reseıden elektr qýatyn qymbatqa alyp otyrmyz – Energetıka mınıstri

ASTANA. KAZINFORM — Májiliste elektrmen jabdyqtaý júıesin jetildirýge arnalǵan jıyn ótip jatyr. Osy jıynda Energetıka mınıstri Erlan Aqkenjenov tapshylyq saldarynan Qazaqstan Reseıden toqty asa qymbat baǵaǵa satyp alyp otyrǵanyn aıtty. 

— Biz qazir elektr energııasynyń defıtsıti baryn moıyndaýymyz kerek. Eki jyl buryn dál qazirgideı qajettilik qatty sezilmeıtin. Búgingi tańda saǵatyna 2 mlrd KVt-qa deıin jetpeı jatady. Biz ony Reseı tarapynan satyp alyp otyrmyz. Shyn máninde, satyp alý quny keıde tipten óte joǵary bolyp ketedi. Sebebi biz keı jaǵdaıda toq eń kóp qajetti kezeńde satyp alyp jatamyz. Baǵa da sol sebepten artyp kete beredi. Baǵa keleshekte tipten joǵary bolyp ketpeý úshin óz generatsııamyzdy damytý kerek. Investor bolmasa, memleket taǵy da Ulttyq qorǵa júginedi. Onyń ústine joba úlken kapıtaldy qajet etedi. Jańa energetıkalyq bloktardy salý úshin 700-800 mln dollardan 1 mlrd dollarǵa deıin qarajat kerek. 2 mlrd KVt qajettilikti jabý úshin bizge qýaty 540 MVt bolatyn 3-4 blokty iske qosýymyz kerek. Osynsha somany Ulttyq qordan alyp jatsaq ne bolatynyn esepteı berińiz, — dedi mınıstr.

Sondaı-aq, qazir álemdik naryqta ınvestıtsııaǵa talas qatty ekenin aıtty.

— Qazir búkil álem ınvestıtsııalar úshin kúresip jatyr. Ózbekstanda ınvestıtsııa tartý úshin ár jobaǵa memleket basshysynyń qoly qoıylady. Investıtsııalardy tartý isin olar sondaı deńgeıge deıin kóterip tastady. Prezıdenttiń ózi bul máselege jiti nazar aýdarady. Al bizde jaýapkershilik ár mınıstrde. Sol sebepti energetıka sııaqty kapıtaldy qajet etetin ınvestıtsııa tartýdyń mańyzy zor dep esepteımiz, — deıdi Erlan Aqkenjenov.

Sondaı-aq, ótken aptada Energetıka mınıstrligi Ekibastuzda jańa elektr stantsııasyn salýǵa tender jarııalaǵan edi.