Reseıden elektr energııasyn ımporttaý jalǵasady
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Reseı Úkimeti arasyndaǵy QR men RF-tiń birtutas energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ratıfıkatsııalaý týraly» Zańy maquldandy.
Kelisim 2023 jylǵy 9 qarashada Astana qalasynda jasaldy.
- Kelisimniń maqsaty – energetıkalyq júıelerdiń qatar jumys isteýi protsesinde paıda bolatyn taraptar arasyndaǵy qarym-qatynastardy rásimdeý, sondaı-aq olardyń ózara is-qımylynyń negizgi sharttaryn aıqyndaý, - dedi senator Súıindik Aldashev.
Onyń aıtýynsha, Qazaqstan men Reseıdiń biryńǵaı energetıkalyq júıeleriniń qatar jumysyn qamtamasyz etý maqsatynda taraptar tómendegideı sharalardy qabyldaıdy:
1) Reseı Federatsııasynan Qazaqstannyń biryńǵaı energetıkalyq júıesine berýge josparlanǵan elektr energııasynyń kólemderin jyl saıyn kelisý;
2) Elektr energııasyn satyp alý men satý qunyn «KEGOC» aktsıonerlik qoǵamy men Reseıdiń «Inter RAO BEJ» kompanııasy arasynda jasalǵan kelisimder boıynsha elektr energııasynyń ruqsat etilgen naqty memleketaralyq saldo aǵyndary sheginde de, odan asyrylǵan kólemde de aıqyndaý;
3) Qazaqstannyń energııa óndirýshi uıymdary jappaıtyn elektr energııasyn tutynýdyń josparly kólemin jabý úshin Reseıden Qazaqstan Respýblıkasyna beriletin elektr energııasyn satyp alýdy kommertsııalyq negizde júzege asyrý.
- Qujat aıasynda Qazaqstannyń elektr energııasyn biryńǵaı satyp alýshysy retinde «Jańartylatyn energııa kózderin qoldaý jónindegi qarjy-esep aıyrysý ortalyǵy» JShS anyqtalǵan. Aıta ketetin jáıt, 2024 jyldyń qorytyndysy boıynsha elimizde elektr energııasyn tutyný kólemi óndirý kórsetkishterinen asyp tústi. Naqty aıtqanda, elektr energııasynyń óndirisi 117,9 mlrd kVts, bul rette tutyný – 119,9 mlrd kVts qurady. Byltyr Reseıden elektr energııasyn ımporttaý kólemi 3,1 mlrd kVts boldy. Ýákiletti organnyń boljamyna sáıkes, 2025 jyly elektr energııasyna tapshylyq 5,7 mlrd kVts quraıdy, bul 2024 jylǵy kórsetkishten 46 paıyzǵa artyq. Elektr energııasynyń tapshylyǵy ásirese tutynýdyń sharyqtaý saǵattarynda, ıaǵnı keshki ýaqytta seziledi. Mundaı jaǵdaıda Biryńǵaı satyp alýshy Reseı Federatsııasynyń energııa júıesinen jetkizilimderdi júzege asyrady, - dedi depýtat.
Onyń sózine qaraǵanda, kelisimge sáıkes, Reseıdiń energetıkalyq júıesi Qazaqstannyń birtutas energetıkalyq júıesinde jıilik pen kerneýdi ruqsat etilgen shekterde qoldaıdy, sonymen qatar Qazaqstannyń biryńǵaı energetıkalyq júıesindegi óndiris pen tutyný arasyndaǵy saǵattyq aýytqýlardy óteıdi. Kelisimdi ratıfıkatsııalaý Qazaqstan men Reseıdiń biryńǵaı energetıkalyq júıeleriniń qatar jumysyn qamtamasyz etip, elektr energetıkasy salasyndaǵy odan ári tıimdi yntymaqtastyqty keńeıtýge, sondaı-aq Qazaqstannyń biryńǵaı energetıkalyq júıelerindegi retteýshi qýat tapshylyǵyn azaıtýǵa múmkindik beredi.
Budan buryn habarlanǵandaı, Energetıka mınıstri Almasadam Sátqalıev kórshi elderden elektr energııasyn satyp alýǵa qatysty túsinik berdi.