Reseıden eki jolmen gaz tartýǵa bolady – Energetıka mınıstri

NUR-SULTAN. QazAqparat – Soltústik pen shyǵystaǵy óńirlerge kógildir otyn jetkizý úshin Reseı aýmaǵynan eki qubyr tartýǵa bolady. Májiliste ótken Úkimet saǵatynda QR Energetıka mınıstri Bolat Aqsholaqov atalǵan jobalardyń múmkindikterine toqtaldy, dep habarlaıdy QazAqparat tilshisi.

«Soltústik pen shyǵystaǵy óńirlerdi gazdandarýdyń eki joly bar. Ol týraly buǵan deıingi kezdesýlerde talaı ret aıttyq. BAQ ókilderiniń saýalyna jaýap bergende de aıtyldy. Birinshi jol – Reseı Federatsııasynyń aýmaǵynan qubyr tartý. Bul másele Qazaqstan-Reseı jumys tobynyń aıasynda qaralyp jatyr. Gaz qubyrynyń eń tıimdi nusqasy anyqtaldy. Kartadan qarasańyzdar, Semeı, Óskemen, Pavlodar óńirlerin Barnaýyl arqyly gazdandyrýǵa bolady. Qubyrdyń boljamdy uzyndyǵy 1000 shaqyrymdaı», - dedi mınıstr.

Sondaı-aq, Petropavl arqyly elordaǵa deıin gaz qubyryn tartý jobasy pysyqtalyp jatqan kórinedi.

«Ekinshi bóligi – Reseı aýmaǵyndaǵy Esilden qubyr tartý. Petropavl-Kókshetaý-Nur-Sultan arasyn jalǵaıtyn qubyrdyń uzyndyǵy 146 shaqyrym bolmaq. Qazir eseptep jatyrmyz. Reseı tarapynyń qajet kólemde gaz berýge daıyn ekeni týraly kelisimi bar. Qazir biz tutyný kólemin durystap esepteýimiz kerek. Gaz qubyryn tóseýdiń tıimdi esebin de jasaý qajet», - dedi Energetıka mınıstri.

Buǵan deıin QR Energetıka mınıstrligi Reseıden gaz tartý úshin shekaralas oblystardyń qajettilikterin zerttep jatqanyn habarlaǵan edi.