Reseıden dızel otynyn Qazaqstanǵa tasymaldaýǵa engizilgen shekteý 20 maýsymǵa deıin jalǵasady

ASTANA. QazAqparat - Reseıden dızel otynyn Qazaqstanǵa tasymaldaýǵa engizilgen konventsııalyq shekteý 20 maýsymǵa deıin jalǵasady. Bul týraly QR Energetıka mınıstrligi Munaı ónerkásibin damytý departamentiniń dırektory Qýandyq Qulmurzın málim etti.

«Aı-80 benzıni men dızel otynyna baǵa burynǵy deńgeıde saqtaldy. Sonymen birge Reseıden dızel otynyn tasymaldaýǵa engizilgen konventsııalyq shekteý 20 maýsymǵa deıin jalǵasady. Sondyqtan da dızel otynyna baǵanyń ózgerýi qısynsyz bolar edi»,-dedi Qulmurzın.

Onyń sózine qaraǵanda, Reseıden Qazaqstanǵa bezın emin-erkin tasymaldanyp jatyr. «Eshqandaı da shekteý joq. Retteý sharalary Aı-92/93 markasyna ǵana qatysty. Munaı ónimderiniń ózge túrleri, onyń ishinde joǵary oktandy benzınge retteý júrgizilmeıdi»,-dep naqtylap ótti ol.

Departament basshysynyń aıtýynsha, Qazaqstannyń munaı bazalarynda qazirgi kezde Aı-92 benzıniniń 238 myń tonna kólemindegi qory bar. Osy oraıda Qazaqstan aýmaǵynda benzın tapshylyǵynyń qaýpi týyndamaıdy.

Budan buryn habarlanǵandaı, búginnen bastap Qazaqstanda Aı-92/93 benzıniniń lıtrine 108 teńge kóleminde shekti bólshek saýda baǵasy belgilendi.

Esterińizge sala keteıik, 20 sáýirde Qazaqstan Reseı Federatsııasynan dızel otynyn temir jolmen tasymaldaýǵa bir aıǵa shekteý engizgen bolatyn.