Reseıden arnaıy shaqyrtylǵan dáriger mamandar J. Dosqalıevtiń densaýlyǵy birqalypty degen qorytyndy jasady
ASTANA. Qazannyń 11-i. QazAqparat /Aıdar Ospanálıev/ - Bas prokýratýra bir top depýtattardyń Qarjy polıtsııasy qyzmetkerleriniń tergeý áreketterin júrgizý barysynda Densaýlyq saqtaý mınıstrliginiń burynǵy basshysy Jaqsylyq Dosqalıevke der kezinde medıtsınalyq kómek kórsetilýin tekserý týraly ótinishiniń qorytyndysyn jarııa etti.
Bas prokýratýranyń resmı ókili Jandos Ómirálıevtiń sózine qaraǵanda, qarjy polıtsııasy organdary J. Dosqalıevti qyrkúıektiń 25-inde qylmys jasady degen kúdikpen ustap, osy kúni Astanadaǵy ýaqytsha ustaý ızolıatoryna ornalastyrǵan.
«Bul rette qylmystyq is júrgizý kodeksiniń normalary tolyq saqtaldy jáne J. Dosqalıevtiń, sondaı-aq onyń advokatynyń mınıstrdiń densaýlyǵyna baılanysty shaǵymdary bolǵan joq.Sondaı-aq, ýaqytsha ızolıator bastyǵynyń sózine qaraǵanda, J. Dosqalıev ózi júrip-turǵan, densaýlyǵyna shaǵymdanbaǵan. Tek qyrkúıektiń 26-sy kúni J. Dosqalıev basy aýratyndyǵyn aıtqannan keıin ǵana arnaıy shaqyrylǵan ızolıatordyń feldsheri jáne jedel medıtsınalyq járdem brıgadasy onyń qan qysymynyń joǵary ekenin tirkep, J. Dosqalıevti aýrýhanaǵa jatqyzǵan. Osylaısha oǵan der kezinde medıtsınalyq kómek kórsetilmedi degen dálel rastalǵan joq. Qarjy polıtsııasy qyzmetkerleriniń áreketterinen zań buzýshylyq tabylǵan joq», - dedi resmı ókil.
Onyń sózine qaraǵanda, J. Dosqalıevtiń densaýlyq jaǵdaıyn tolyq ári obektıvti zertteý maqsatynda Bas prokýratýranyń usynysy boıynsha Reseıdiń densaýlyq saqtaý organdarynan shaqyrylǵan professorlary bar táýelsiz medıtsınalyq komıssııa tekserý júrgizdi. Olar J. Dosqalıevtiń júrek, qan tamyry qyzmetiniń buzylǵanyn rastaıtyn obektıvti aıǵaq joq degen qorytyndy berdi. «Osylaısha, atalǵan komıssııanyń qorytyndysy boıynsha J. Dosqalıevtiń densaýlyq jaǵdaıy birqalypty, ózine qoıylǵan suraqtarǵa durys jaýap bere alady. Sóılegen sózinde de aqaý baıqalmaıdy», - dedi J. Ómirálıev.
