Reseıden ákelingen aǵashtan karantındik zııankes tabyldy
ASTANA.KAZINFORM — Aqmola oblysynda ósimdikterdi karantındik tekserý barysynda qaraǵaıdyń qara murtty qońyzynyń qurttary anyqtaldy. Bul týraly AShM baspasóz qyzmeti málim etti.
Kólemi 40 tekshe metr bolatyn qaraǵaıdan daıyndalǵan aǵash materıaldary Reseıdiń Qorǵan oblysynan ákelingen.
Tekserý kezinde QR AShM Agroónerkásiptik keshenindegi memlekettik ınspektsııa komıtetiniń Kókshetaý qalalyq aýmaqtyq ınspektsııasynyń ósimdikter karantıni jónindegi memlekettik ınspektorlary ónimniń zalaldaný belgilerin anyqtady.
Zerthanalyq saraptama qorytyndysynda atalǵan zııankestiń dernásilderi bar ekeni rastaldy.
Belgilengen talaptarǵa saı kelmeıtin karantındik ónimdi ákelgeni úshin jeke kásipkerge qatysty ákimshilik hattama toltyryldy.
Karantındik nysandardyń elge ákelinýi men taralýynyń aldyn alý, sondaı-aq ósimdik ónimderiniń qaýipsizdigin qamtamasyz etý jumystary jalǵasady.
Aıta keteıik, buǵan deıin Úkimet SQO-da aǵash óńdeý zaýytyn salý jónindegi ınvestıtsııalyq kelisimdi maquldaǵanyn jazdyq.