Reseıden ákelingen 63 myń jumyrtqa Qazaqstan aýmaǵyna kirgizilmedi

ASTANA. KAZINFORM — «Syrym» veterınarııalyq baqylaý beketinde Samar oblysynan (RF) Qyzylorda oblysyna baǵyt alǵan júk kóligi toqtatyldy. Tekserý barysynda kólikte 63 000 taýyq jumyrtqasy tasymaldanyp kele jatqany anyqtaldy.

QR AShM Veterınarııalyq baqylaý jáne qadaǵalaý komıteti Eýrazııalyq ekonomıkalyq odaqtyń veterınarııalyq-sanıtarııalyq talaptarynyń buzylǵany týraly habarlady.

— Qujattyq baqylaý nátıjesinde veterınarııalyq súıemeldeý qujattarynda kórsetilgen júk jóneltýshi Eýrazııalyq ekonomıkalyq odaqqa múshe memleketterdiń aýmaǵyna janýarlardan alynatyn ónimdi jetkizýge ruqsaty bar uıymdar tizimine enbegeni anyqtaldy. Osyǵan baılanysty júk keri qaıtaryldy. Júrgizýshige QR Ákimshilik quqyq buzýshylyq týraly kodeksiniń 406-baby boıynsha ákimshilik hattama toltyrylyp, aıyppul salyndy. Tasymaldaýshyǵa veterınarııalyq-sanıtarııalyq normalardyń talaptary túsindirildi, — delingen komıtet taratqan aqparatta.

Aıta keteıik, 2025 jyldyń basynan beri Qazaqstannyń EAEO elderimen shekarasynda veterınarııalyq-sanıtarııalyq ınspektorlar 57 185 kólik quralyn jáne shamamen 738 myń tonna mal sharýashylyǵy ónimin tekserdi. Nátıjesinde 1 020 kólik keri qaıtarylyp, 397 ákimshilik hattama rásimdeldi. Aıyppuldardyń jalpy somasy — 19,7 mln teńge.

Úshinshi eldermen shekaradaǵy ótkizý pýnktterinde 21 654 avtokólik, 69 802 temirjol quramy, 257 teńiz kemesi jáne 2 139 241,2 tonna mal ónimderi tekserildi. Nátıjesinde 24 avtokólik keri qaıtarylyp, 24 ákimshilik hattama toltyryldy.

Budan buryn Qazaqstan arqyly ótkizbek bolǵan 42,2 tonna taýyq eti Qytaıǵa keri qaıtarylǵanyn jazǵanbyz.