Reseıden ákelingen 605 myń taýyq jumyrtqasy keri qaıtaryldy

ASTANA. KAZINFORM- – «Syrym» veterınarııalyq baqylaý beketinde Reseıden Qazaqstanǵa tasymaldanǵan 605 myń dana taýyq jumyrtqasynyń syrtqy qaptamasynda tańbalaý japsyrmalary joq ekeni anyqtaldy. Osyǵan baılanysty ónim tıelgen eki júk kóligi keri qaıtarylyp, júrgizýshilerge aıyppul salyndy.

jumyrtqa
Foto: QR Aýyl sharýashylyǵy mınıstrligi

QR Aýyl sharýashylyǵy mınıstrligi baspasóz qyzmetiniń habarlaýynsha, Samara oblysynan Qyzylorda oblysyna baǵyt alǵan eki júk kóligimen barlyǵy 605 myń dana taýyq jumyrtqasy tasymaldanǵan.

Veterınarııalyq baqylaý barysynda ónimniń syrtqy qaptamasynda tańbalaý japsyrmalarynyń joqtyǵy anyqtaldy. Osyǵan baılanysty eki kólik te keri qaıtaryldy. Júrgizýshilerge qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 406-babyna sáıkes ákimshilik hattamalar toltyrylyp, aıyppul salyndy.

Júk tasymaldaýshylarǵa Qazaqstan Respýblıkasynyń jáne Eýrazııalyq ekonomıkalyq odaqtyń veterınarııalyq-sanıtarııalyq talaptary túsindirildi. Atap aıtqanda, Keden odaǵy komıssııasynyń 2010 jylǵy 18 maýsymdaǵy № 317 «Eýrazııalyq ekonomıkalyq odaqta veterınarııalyq-sanıtarııalyq sharalardy qoldaný týraly» sheshiminiń talaptary jetkizildi.

Jyl basynan beri óńirdegi veterınarııalyq baqylaý beketterinde barlyǵy 294 zańbuzýshylyq tirkelgen. Baqylaý is-sharalarynyń nátıjesinde 294 kólik keri qaıtarylyp, 147 tulǵaǵa qatysty ákimshilik sharalar qoldanylǵan.

Aýyl sharýashylyǵy mınıstrligi syrtqy ekonomıkalyq qyzmetke qatysýshylar men júk tasymaldaýshylardy Qazaqstan Respýblıkasy jáne Eýrazııalyq ekonomıkalyq odaq aýmaǵynda qoldanystaǵy veterınarııalyq-sanıtarııalyq talaptardy qatań saqtaýǵa shaqyrdy.

-Ónimniń tıisti tańbamen belgilenýi, veterınarııalyq ilespe qujattardyń durys rásimdelýi jáne tasymaldanatyn taýardyń belgilengen normalarǵa sáıkestigi – memlekettik shekara arqyly zańdy túrde ótkizý men eldiń veterınarııalyq-sanıtarııalyq qaýipsizdigin qamtamasyz etýdiń mindetti sharttary,-dellingen habarrlamada.

Osyǵan deıin Reseıden jetkizilgen 22 tonna bıdaı kebegi keri qaıtarylǵan bolatyn.