Reseıden ákelingen 252 myń dana taýyq jumyrtqasy keri qaıtaryldy
ASTANA. KAZINFORM — Reseıden Qazaqstanǵa veterınarııalyq qujattarsyz 252 myń dana taýyq jumyrtqasyn ákelýge jol berilmedi.
«Jaısań» veterınarııalyq baqylaý beketinde QR AShM Veterınarııalyq baqylaý jáne qadaǵalaý komıteti Aqtóbe oblystyq aýmaqtyq ınspektsııasynyń qyzmetkerleri Reseıden Baıqońyr qalasyna baǵyt alǵan kólikti tekserý kezinde júkke qajetti veterınarııalyq qujattardyń joq ekenin anyqtady.
Osyǵan baılanysty tıisti akt pen ákimshilik hattama toltyrylyp, jumyrtqa Reseıge keri qaıtaryldy.
Tasymaldaýshyǵa veterınarııalyq zańnama talaptary jáne baqylaýdaǵy ónimderdi memlekettik shekara arqyly ótkizý qaǵıdalary túsindirildi.
Veterınarııalyq baqylaý jáne qadaǵalaý komıteti baqylaýdaǵy ónimderdiń memlekettik shekara arqyly ótkizilýin qatań baqylaýdy jalǵastyratynyn habarlady.
Eske salaıyq, buǵan deıin BQO-da 20 tonna jumyrtqany zańsyz tasymaldaýǵa tosqaýyl qoıylǵanyn habarlaǵanbyz.
