Reseıden 40-tan astam sheteldik kompanııa Qazaqstanǵa qonys aýdaryp jatyr
Elordada ótken Qazaqstan-german bıznes forýmy aıasynda BAQ ókilderine suhbat bergen Almas Aıdarovtyń dereginshe, Qazaqstan reseılik naryqtan ketýge nıet tanytyp otyrǵan 20-dan astam eldiń 300 kompanııasyna qyzyǵýshylyq tanytyp otyr. Olardyń basym bóligi Germanııa men AQSh kompanııalary ári negizinen ónerkásip, saýda jáne aqparattyq tehnologııalar salasynda jumys isteıdi.
«Biz qyzyǵýshylyq tanytqan 300 kompanııanyń 50-i birden kóshý josparlary joqtyǵyn, ahýaldyń munan ary qalaı damıtynyn kútip otyrǵandyqtaryn aıtty. 44 kompanııamen ýaǵdalastyq bar. Olar qazirgi ýaqytta keńselerin nemese qyzmetkerleri ne óndiristerin bizge kóshirip jatyr», - dedi mınıstr orynbasary.
Onyń aıtýynsha, eń birinshi bolyp amerıkalyq Honeywell korporatsııasy keńsesin Reseıden Almatyǵa kóshirdi. Basqarý jáne avtomattandyrýdyń elektrondy júıesin shyǵaratyn kompanııanyń aınalymy búkil Qazaqstannyń ishki jalpy óniminen asyp túsedi.
«Kompanııalardyń kópshiligi Qazaqstanǵa kele almaıdy. Óıtkeni, ekonomıkamyzdyń kólemi olarǵa jetkiliksiz. Biraq, olardyń barlyǵy úshin Eýrazııa naryǵynda qalý qyzyqtyryp otyr. Olar Reseıde jumys isteı almaıdy. Biraq, eýrazııalyq naryqta qalýǵa nıetti. Al biz úshin olar óndiristerin ashpasa da tym bolmaǵanda keńselerin ashýy óte mańyzdy», - dedi Almas Aıdarov.
