Reseıden 4 jolbarys elimizge qashan jetkiziledi
ASTANA. KAZINFORM — Reseıden elimizge jolbarystardy jetkizý máselesi áli pysyqtalyp jatyr. Bul týraly Ekologııa jáne tabıǵı resýrstar mınıstrliginen málim etti.
— Qazirgi ýaqytta Qazaqstan Respýblıkasy men Reseı Federatsııasy arasyndaǵy jolbarys boıynsha Memleketaralyq jumys tobynyń otyrystary júrip jatyr. Mınıstrlik alǵashqy jolbarystardy Qazaqstanǵa ákelý máselesin pysyqtap jatyr. Ázirge naqty ýaqyty anyqtalǵan joq, — dedi mınıstrlikten agenttiktiń saýalyna oraı.
Aıta keteıik, 2024 jyly 21 qyrkúıekte Nıderlandynyń Henderdaell zoobaǵynan «Іle-Balqash» rezervatyna 2 jolbarys jetkizildi. Qazir jolbarystardyń jaǵdaıy birqalypty. Qys mezgilin jaqsy qystap shyqty.
— Jolbarystar qorshaý ishinde bolǵandyqtan olardyń kúndelikti kútimimen «Jolbarys» jabaıy mysyq tektesterdi saqtaý qaýymdastyǵynyń mamandary aınalysady. Rezervat qyzmetkerleri, ıaǵnı memlekettik ınspektorlar aýmaqta zańsyzdyqqa jol bermeý jáne orman órtin boldyrmaý, Balqash kólin jaǵalaı kezekshilik jumystaryn júrgizý, arnaıy beketter arqyly baqylaý jumystarymen aınalysady. Rezervat shtatynda jolbarystardy kútip ustaý boıynsha arnaıy maman qarastyrylmaǵan. Sondyqtan rezervat jolbarystardy kútý, baqylaý jáne veterınarlyq qyzmet kórsetýdi júzege asyratyn «Jolbarys» qaýymdastyǵymen shart jasasqan. Al rezervat qaýymdastyqtyń jumysyn baqylaý júrgizedi, — dedi vedomstvodan.
Aıta keteıik, 2010 jyly Sankt-Peterbýrgte Jer jahandaǵy jolbarystardy aman alyp qalý boıynsha Halyqaralyq forým ótti. Dál osy forýmda WWF (Dúnıejúzilik jabaıy tabıǵat qory) usynysy negizinde Qazaqstan men Reseı Ortalyq Azııadaǵy jolbarystardy qaıta ósirý baǵdarlamasynyń qolǵa alynǵany jarııalandy. Sodan keıin Ózbekstan, Ázerbaıjan, Grýzııa, Iran, Qyrǵyzstan, Qytaı, Tájikstan, Túrkııa elderiniń Turan jolbarysyn ósirýge bolady-aý degen aımaqtary zerttelip, saralanǵanymen, aqyry, eki oryn, atap aıtqanda Aral teńiziniń Ózbekstanǵa qarasty aýmaǵy men Qazaqstannyń Balqash kóliniń mańy tańdalyp alyndy. WWF Turan jolbarystaryn (negizinen Amýr jolbarystarynan ósirý) Qazaqstanda — Balqash óńirinde qalpyna keltirý bastamasyna qoldaý bildirdi. 2017 jyldyń 8 qyrkúıeginde Qazaqstan Úkimeti jolbarysty Іle-Balqash aımaǵyndaǵy tarıhı tirshilik mekenine qaıtarý boıynsha josparyn jarııa etip, jolbarys reıntrodýktsııasynyń birlesken baǵdarlamasyn iske asyrý jóninde WWF-men memorandýmǵa qol qoıdy.
Buǵan deıin Ekologııa jáne tabıǵı resýrstar mınıstri Erlan Nysanbaev Úkimet otyrysynan keıin ótken baspasóz máslıhatynda Turan jolbarysynyń popýlıatsııasyn qalpyna keltirý jumystary qalaı júrip jatqanyn aıtty.