Reseıden 2014 jyldyń 1 qańtaryna deıin bajsyz munaı alýdan Qazaqstan eleýli paıda tabady - S. Myńbaev
ASTANA. 7 naýryz. QazAqparat - 2014 jyldyń 1 qańtaryna deıin Reseıden Qazaqstanǵa bajsyz munaı jetkizý júzege asyrylady.
Budan Qazaqstan tarapy eleýli paıda tappaq. Búgin QR Parlamenti Senatynyń jalpy otyrysynda Munaı jáne gaz mınıstri Saýat Myńbaev osylaı málim etti.
Mınıstrdiń aıtýynsha, budan bólek, 2014 jyldyń 1 qańtaryna deıin ózara munaı jetkizý quptalsa, ony jetkizý almasý operatsııalary rejiminde júrgizilýi múmkin. «Jalpy Qazaqstan da, Reseı de ózderin munaımen tolyq qamtamasyz ete alady. Biraq, almasý operatsııalary munaıdy munaı óńdeý zaýyttaryna jetkizý logıstıkasyn jeńildete túsedi. Bundaı jetkizý rejiminde eki tarap ta munaı eksportynan kiristi joǵaltpaıdy. Qazir 2014 jyldyń 1 qańtaryna deıingi kezeńde Reseıden Qazaqstanǵa bajsyz munaı jetkizýden biz emes, reseı shyǵyndalyp jatyr. Oǵan Reseı osy qujat boıynsha kelisim berip otyr», - deıdi S. Myńbaev. Budan bólek, mınıstrdiń aıtýynsha, kelisim aıasynda 2012-2014 jyldar aralyǵynda Qazaqstanǵa bajsyz janar-jaǵarmaı jetkizýden bolǵan Reseıdiń bólshek shyǵyndaryn óteý de qarastyrylady.
«Osy kelisimniń arqasynda Qazaqstan Reseıden bajsyz munaı jetkizýden eleýli paıda tapty, 2014 jyldyń 1 qańtaryna deıingi kezeńde de paıda tabatyn bolady», - deıdi S. Myńbaev.
