Reseıdegi jol apaty: Qaza bolǵan qazaqstandyqtardyń deneleri búgin jetkiziledi
AQTÓBE. QazAqparat - Reseıdiń «Orynbor - Sol-Iletsk» tasjolynda qaza bolǵan qazaqstandyqtardyń deneleri elge búgin jetkiziledi, dep habarlaıdy QazAqparat tilshisi.
Buǵan deıin habarlaǵanymyzdaı, 28 qarasha kúni «Orynbor - Sol-Iletsk» tasjolynyń Elshanka aýyly mańynda iri jol apaty boldy. «Man» markaly júk kóligi men «Folksvagen Sharan» avtokóligi soqtyǵysty. «Folksvagende» jeti jolaýshy bolǵan, barlyǵy - Qazaqstan azamattary. Apat ornynda bes adam mert bolyp, taǵy ekeýi Sol-Iletsk qalasynyń aýrýhanasyna jetkizildi. Qaza tapqandardyń úsheýi Aqtóbe oblysynyń, ekeýi - Qyzylorda oblysynyń turǵyndary.
Aqtóbe oblystyq Tótenshe jaǵdaılar departamenti aqparatty áleýmettik jelige jarııalap, qaza bolǵan adamdardyń týystaryn izdeý úshin jedel jelini iske qosty. Keıin ajal qushqan qazaqstandyqtardyń barlyǵynyń tulǵasy anyqtaldy.
«Qaza bolǵan adamdardyń týystary Orynborǵa úsh kólikpen ketti. Saǵat 13:30-da deneleri beriledi. Olardyń úsheýi Aqtóbe oblysynyń, ekeýi Qyzylorda oblysynyń týmasy. Qyzylorda oblysynyń ákimdigi Aqtóbege kólik jiberdi. Olar osy jerden alyp ketedi. Denesin jetkizý kezinde «QazAvtoJol» mekemesi men polıtsııa kóligi ilesip júredi. Jol-kólik oqıǵasynyń naqty qalaı bolǵanyn anyqtaý múmkin emes. Sebebi, kóliktiń bólshegi jan-jaqta jatyr. Týystarymen sóılesip, jeńil kólik Aqtóbeden Orynborǵa bet alǵanyn bildik. Sebebi, oqıǵa ornynan úlken kólemde aqsha tabyldy», - dedi Aqtóbe oblystyq TJD bastyǵynyń orynbasary Qaırat Qasym.
Aıta keteıik, qazirgi ýaqytta qaza bolǵan adamdardyń týystary olardy aqtyq saparǵa shyǵaryp salý úshin daıyndyq júrgizip jatyr.
«Jol apaty týraly habardy tanysym telefon arqyly jetkizdi. Ol kezde adamdardyń jaǵdaıy týraly eshteńe aıtpady. Ózimiz qaıta telefon shalyp, qaza bolǵanyn estidik. Aǵam Serik Qaýanov óz kóligimen tańǵy saǵat 7:00-de Aqtóbe qalasynan shyǵyp ketti. Jol boıy telefon shalyp, jaqsy bara jatqanyn aıtty. Keıin bári únsiz qaldy. Kýágerlerdiń aıtýynsha, júk kóligi qarsy jolǵa shyǵyp ketken eken. Ári aýa raıy qolaısyz, taıǵaq boldy. Joldyń qaq ortasynda júk kóligi turǵan kezde eshkim de kóligin toqtatyp úlgermes edi. Artynda úsh balasy qaldy. Mektepte oqıdy, balabaqshaǵa barady. Al kishkentaıy 7 aılyq», - dedi Serik Qaýanovtyń inisi Mıras Tánibergenov.
