Reseıdegi jol apaty: 2 qazaqstandyq jansaqtaý bóliminde jatyr
ASTANA. QazAqparat - Eki kúni buryn Reseıdiń Saratov oblysynda tirkelgen jol apaty saldarynan aýrýhanaǵa túsken eki qazaqstandyq jansaqtaý bóliminde jatyr, dep habarlaıdy QazAqparat tilshisi.
«Osydan eki kún buryn qazaqstandyq avtobýs Reseı Federatsııasynyń Saratov oblysynda temirjol poıyzymen soqtyǵysyp, saldarynan bes adam qaza tapty. Avtobýstyń ishinde jeti jolaýshy bolǵan. Onyń beseýi kóz jumdy. Qaza tapqandardyń barlyǵy Ózbekstan azamaty. Júrgizýshi jáne onyń kómekshisi Qazaqstan azamattary. Olar tiri. Biraq, jaǵdaılary óte aýyr, jansaqtaý bóliminde jatyr. Týystary sol jaqta. Habar berildi. Tergeý júrgizilip jatyr. Bizdiń Astrahandaǵy konsýl bul máseleni erekshe baqylaýyna alyp, kúndelikti jumysyn júrgizip jatyr», - dedi QR SІM resmı ókili Aıbek Smadııarov.
Eske sala ketsek, osydan eki kún buryn Reseıdiń Saratov oblysynda Qazaqstan men Ózbekstan jolaýshylary mingen reıstik avtobýs apatqa ushyraǵan bolatyn.
«17 qarasha kúni RF Saratov oblysynyń Ozınskıı aýdanyndaǵy temir jol ótpesinde "Saratov-Oral" reıstik avtobýsy júk poıyzymen soqtyǵysty. Bastapqy málimet boıynsha, avtobýsta 7 jolaýshy bolǵan, olardyń ekeýi Qazaqstan azamattary bolsa, beseýi - ózbekstandyqtar», - dep habarlady QR ІІM Tótenshe jaǵdaılar komıtetiniń resmı ókili Nursultan Nurahmetov.
Osydan keıin Qazaqstannyń Astraxandaǵy konsýly Qanat Shekqalıev bul oqıǵa boıynsha jedel túrde jergilikti bılikpen baılanysqa shyǵyp, apattyń mán-jaǵdaıyn anyqtap jatqany habarlanǵan bolatyn.
