Reseıdegi týrnırdiń alǵashqy oıynynda «Barys» jeńiske jetti
NUR-SULTAN. QazAqparat - Elordalyq «Barys» shaıbaly hokkeıden Chelıabınsk oblysy gýbernatorynyń kýbogyndaǵy alǵashqy oıynyn ótkizdi, dep habarlaıdy QazAqparat tilshisi.
Qazaqstandyq komanda atalǵan týrnırdegi birinshi oıynyn Reseıdiń «Avtomobılıst» (Ekaterınbýrg) klýbyna qarsy ótkizdi.
Oıynnyń 9-mınýtynda «Barys» sapynan Nıkıta Mıhaılıs esep ashty. Budan keıin eki komandanyń da esepti ózgertetin birneshe múmkindigi bolǵan edi.
Ekinshi kezeńde de tablodaǵy esep ózgerissiz qaldy.
Úshinshi kezeńniń 49-mınýtynda reseılik klýbtan Brýks Meısek tarazy basyn teńestirse, Nıkıta Mıhaılıs 51-mınýtta «Barysty» qaıtadan alǵa shyǵardy.
Elordalyq klýb qarsylasynan 3:1 esebimen basym tústi.
Endi «Barys» hokkeıshileri 25 tamyzda «Traktor» (Chelıabınsk), 27 tamyzda «Metallýrg» (Magnıtogorsk) komandalarymen sheberlik baıqasady.
Sondaı-aq, búgin «Traktor» jáne «Metallýrg» komandalary ózara kezdesedi.
Eske salsaq, budan buryn elordada ótken QR Prezıdenti kýbogynda «Barys» jeńimpaz atandy.
Atalǵan týrnırde elordalyq klýb «Avtomobılıstke» 3:4 esebimen jol berdi.
