Reseıdegi órt: Qazaqstan arnaýly kúsh-quraldar tobyn jasaqtady

ASTANA. QazAqparat – Reseıdegi órtke baılanysty elimizdiń shekaralas aýmaqtaǵy órt sóndirý garnızondary daıyndyqqa keltirildi. Bul týraly Úkimet otyrysynda Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.

Búgin Úkimet otyrysynda Premer-Mınıstr Álıhan Smaıylov birinshi vıtse-mınıstrden: «Qazirgi ýaqytta soltústik kórshimizde orman alqaptary órtenip, jaǵdaı ýshyǵyp tur. Osyǵan tótenshe jaǵdaı qyzmetteri qanshalyqty daıyn?» dep suraǵan edi.

Saýalǵa jaýap bergen Ibragım Kúlshimbaevtyń aıtýynsha, shekara mańyndaǵy bólimshelerdiń tabıǵı órtke jedel den qoıý maqsatyndaǵy ózara is-qımyl jospary jańartylǵan.

«Qazirgi ýaqytta shekara mańyndaǵy garnızondardyń kúsh-quraldary daıyn tur. RF aýmaǵynda órt ahýaly qıyndaǵan jaǵdaıda Qazaqstan tarapynan 247 jeke quram men 46 órt sóndirý avtotehnıkasynan jáne 2 áýe bortynan jasaqtalǵan kúsh-quraldar toby jasaqtaldy. Shekaradaǵy tótenshe jaǵdaı mınıstrdiń qatań baqylaýynda», - dedi ol.