Reseıdegi qyrǵyz dıasporasy eldiń jańa úkimetimen qarym-qatynas ornatýǵa talpynýda
MÁSKEÝ. Sáýirdiń 20-sy. QazAqparat /Narymbek Ysmaǵulov/ - Reseıdegi qyrǵyz dıasporasy Qyrǵyzstannyń ýaqytsha úkimetine jan-jaqty kómek kórsetýge ázirlik bildiredi.
Qyrǵyz Respýblıkasy ýaqytsha úkimetiniń tóraǵasy Roza Otymbaevaǵa joldanǵan ashyq hatta «KGinfo.ru» saraptamalyq portalynyń bas redaktory Asylbek Egemberdıev osyndaı málimdeme jasady.
«Kóp azap shekken qyrǵyz halqy búgin Otanynan jyraqta júrgen otandastarynyń qoldaýy men kómegine muqtaj. Sáýirdiń 6-7-sinde bolǵan oqıǵalar men úkimet taratylǵannan keıin kóptegen basshylar otstavkaǵa ketti, olardyń ornyna jańa saıasatkerler keldi. Qyrǵyzstanda bolǵan jaǵdaı úshin bul zańdy qubylys»,- delingen úndeýde.
Qyrǵyzstan azamattary Reseı Federatsııasynda turady jáne jumys isteıdi. Olar túrli saladaǵy joǵary sanatty mamandar jáne olardy týǵan eliniń taǵdyry tolǵantpaı qoımaıdy. Halqymyzdyń laıyqty ókilderi qyrǵyz dıasporasynyń ózegi bolyp tabylady, olar mádenı jáne ulttyq biregeılikti saqtaýǵa baǵyttalǵan jumystar júrgizip otyr, - dep jalǵastyrady avtor óz sózin.
Reseı Federatsııasyndaǵy qyrǵyz dıasporasyn óz Otanynyń problemalary árqashan oılantyp keledi. «Qyrǵyzstan damyǵan jáne gúldengen elge aınalý úshin, biz jan-jaqty kóme kórsetýge ázirmiz. Ókinishke oraı óz otandastaryna salqyn bolǵan burynǵy el basshylyǵy bizge de jaǵdaı jasaı qoıǵan joq bolatyn», dep jazady A.Egemberdıev.
«Otandastaryńyz tarıhı Otanynyń ómirine belsendi atsalysqysy keledi. Men jáne meniń pikirlesterim Otanymyzdyń ıgiligi úshin birlesip jumys isteý jobasyn júzege asyrý úshin barlyq qajetti málimetter berýge ázirmiz», - delingen hatta.
