Reseıdegi kólik apatynan zardap shekken qazaqstandyqtardyń esimderi anyqtaldy
ASTANA. QazAqparat - Reseıdegi jol-kólik apatynan zardap shekken Qazaqstan azamattarynyń esimderi anyqtaldy. Olar Ońtústik Qazaqstan oblysynyń turǵyndary bolyp shyqty, dep habarlaıdy QazAqparat.
Sońǵy málimetterge qaraǵanda, atalǵan JKO saldarynan qaza bolǵandardyń sany 19 adamǵa jetti. Olardyń arasynda 47 jastaǵa Danııar Shildebaev esimdi Qazaqstan azamaty da bar. Aman qalǵan avtobýstyń ekinshi júrgizýshisi 40 jastaǵy Nurǵalı Sarmanov ta OQO turǵyny.
OQO jolaýshylar kóligi jáne avtomobıl joldary basqarmasy málimetinshe, RF Vladımır oblysynda iri jol apatyna tap bolǵan avtobýs OQO-daǵy eshbir tasymaldaýshy kompanııaǵa tirkelmegen.
«Reseıde apatqa ushyraǵan avtobýsty aýdandyq jáne oblystyq bazalardan tekserdik, bul kólik bizde tirkelmegen. Alaıda halyqaralyq kóliktik tasymaldar bizdiń basqarmaǵa tıesili emes, ıaǵnı QR Investıtsııalar jáne damý mınıstrligi quzyrynda», - dedi vedomstvonyń bas mamany Asan Jumabaev.
Aldyn ala derekterge qaraǵanda, avtobýs jolaýshylardy OQO Saryaǵash aýdany Derbisek aýylynan tasymaldaǵan.
Aıta keteıik, Reseı Federatsııasynyń Vladımır oblysynda Qazaqstannan shyqqan avtobýs jol apatyna ushyraǵany týraly buǵan deıin habarlaǵan edik. Vladımır oblystyq TJM-niń málimetterine súıensek, apatqa ushyraǵan avtobýsta 55 Ózbekstan azamaty jáne 2 júrgizýshisi qazaqstandyq bolǵan.
