Reseıdegi qazaqtar Egemen Qazaqstan-ǵa jazylýǵa múmkindik aldy

ASTANA. QazAqparat - Reseıdegi qandastarymyz «Egemen Qazaqstan» gazetine jazylýǵa múmkindik aldy. Bul týraly búgin Ortalyq kommýnıkatsııalar qyzmetinde ótken baspasóz máslıhatynda atalǵan basylymnyń basqarma tóraǵasy Darhan Qydyráli aıtty, dep habarlaıdy QazAqparat tilshisi.

«Ózderińizge málim, Elbasymyzdyń Dúnıejúzi qazaqtarynyń quryltaıynda shettegi, ásirese, shekaralas elderdegi qandastarymyzǵa ulttyq aqparat quraldarymyzdyń taralýyn tapsyrǵan bolatyn. Osyǵan baılanysty, biz birshama jumys atqardyq. Sonyń nátıjesinde Reseıde «Egemen Qazaqstan» gazetin taratý jóninde ruqsat lıtsenzııany aldyq. Baspasózge jazylý boıynsha katologqa endi. Endi jańa jazylý maýsymynan bastap Reseıdegi qandastarymyz «Egemen Qazaqstanǵa» jazyla alady. Bul - bizdiń aqparat keńistigimizdiń, qazaq tili keńistiginiń ulǵaıýy degen sóz», - dedi Darhan Qydyráli.

Onyń aıtýynsha, Reseıden bólek Mońǵolııada, Qyrǵyzstanda, Ózbekstanda elimizdiń bas basylymyn taratýǵa baǵyttalǵan jumystar júrgizilip jatyr. Osy memleketterdegi Elshilikterimizge de arnaıy hat joldanǵan.
 

«Qazir Qyrǵyzstanda tilshimiz jumys istep jatyr. Dúnıejúzilik kóshpeliler oıynynan kóptegen aqparat jibergenin bilesizder. Arnaýly tilshi degennen shyǵady, qazir Túrkistan oblysy bólinip shyqqannan keıin Shymkentte jáne Túrkistan oblysynda menshikti tilshi qarastyryp otyrmyz. Jaqynda jumysyna kirisedi. Sol sııaqty bizdiń arnaýly tilshilerimiz qazir Eýropa elderinde, AQSh-ta bar. Olar - Egemende qyzmet atqarǵan, qazir «Bolashaqpen» oqyp jatqan jastarymyz»,- dedi gazet basshysy.