Reseıdegi Qazaqstan mádenıeti kúnderi kontsertpen aıaqtaldy

MÁSKEÝ. QazAqparat – Reseıdegi Qazaqstan Mádenıeti kúnderi qazaqstandyq mýzykanttardyń P. Chaıkovskıı atyndaǵy Máskeý memlekettik konservatorııasynyń sahnasyndaǵy kontsertimen qorytyndylandy, dep habarlaıdy QazAqparattyń menshikti tilshisi.

Máskeý jurtshylyǵy Qazaqstannyń «Forte Trio» memlekettik trıosy jáne halyqaralyq baıqaýlardyń laýreaty Ámir Tebenıhınniń (fortepıano) ónerine tánti boldy. Kontsertte N. Meńdiǵalıevtiń «Dombyra týraly ańyzy», Ferents Lıstiń sı-mınor sonatasy, A. Pıatsollanyń týyndysy, A. Jaıymnyń «Kóruǵly» poemasy oryndaldy.
«Biz Máskeýge jıi kelip kontsert qoıamyz ári reseılik mýzykanttardy tyńdap, qulaq quryshyn qandyryp qaıtamyz. Bul jerde óner kórsetý – úlken jaýapkershilik ári orasan zor áserge bóleıdi», - deıdi «Qazaqkontsert» memlekettik kontsert uıymynyń kórkemdik jetekshisi Tımýr Ýrmancheev.
Eske sala keteıik, 7-11 qyrkúıek kúnderi Máskeýde Qazaqstan Mádenıeti kúnderi ótti. Onyń aıasynda estradalyq kontsert, kitap kórmesi bolyp, qazaq kınematografynyń úzdik týyndylary kórsetildi.

Avtor: Medet Ahmetov