Reseıdegi Qazaqstan Elshiliginde aldaǵy Parlament Májilisiniń saılaýyna qatysty brıfıng ótti
ASTANA. QazAqparat - Máskeýde Reseıdegi Qazaqstan Elshiliginde 2016 jylǵy 20 naýryzda Qazaqstan Respýblıkasynyń Parlamenti Májilisiniń kezekten tys saılaýyn uıymdastyrý máselelerine qatysty jergilikti BAQ-pen brıfıng ótkizildi.
Bul týralyQazaqstannyń Reseıdegi Elshiligi habarlady.
Brıfıng barysynda QR Elshiliginiń keńesshi-ýákili Marat Syzdyqov BAQ ókilderin Qazaqstan Respýblıkasynyń saılaý zańnamasynyń mańyzdy erejelerimen, saılaý naýqanynyń jáne baıqaý júrgizýiniń uıymdastyrýshylyq aspektilerimen egjeı-tegjeıli tanystyryp ótti.
Qazaqstandaǵy parlamenttik saılaý barysyn baıqaýǵa birqatar halyqaralyq uıymdardan 700-ge jýyq adam qatysýy múmkin ekendigi, shet elderdiń jáne halyqaralyq uıymdar baıqaýshylaryn tirkeý rásimi aǵymdaǵy jylǵy 14 naýryzǵa deıin jalǵasatyny týraly aıtyldy.
Belgili reseılik BAQ-tar saılaý barysynan belsendi túrde aqparat taratýǵa shaqyryldy jáne jýrnalısterdiń tirkelý tártibimen tanysty.
M.Syzdyqov 19 aqpanda saılaýǵa qatysyp otyrǵan 6 saıası partııanyń, atap aıtqanda: «Nur Otan» partııasynyń, Qazaqstan kommýnıstik halyq partııasynyń, «Aq jol» Demokratııalyq partııasynyń, «Birlik» partııasynyń, Jalpyulttyq sotsıal-demokratııalyq partııasynyń, jáne «Aýyl» Halyqtyq-demokratııalyq patrıottyq partııasynyń partııalyq tizimderin tirkeýden ótkizilýi aıaqtalǵanyn eskerdi. Jalpy tizimge 234 kandıdat kirdi, - dedi dıplomat.
18 naýryzǵa deıin jalǵasatyn saılaý naýqanynyń úgit kezeńiniń bastalǵany, 19 naýryz «tynyshtyq» kúni bolyp belgilengeni týraly jetkizildi.
Parlament Májilisine jalpy alǵanda 107 depýtat, olardyń ishinde, 98 - partııalyq tizimder negizinde toǵyzy - Qazaqstan halqy Assambleıasy atynan saılanady.
Sondaı-aq Qazaqstan dıplomaty Reseı Federatsııasy aýmaǵynda QR azamattarynyń daýys berý tártibi men rásimderin túsindirip berdi.
Reseı aýmaǵynda ár Qazaqstan azamaty 20 naýryzda saǵat 07:00-20:00 aralyǵynda Máskeý, Sankt-Peterbor, Qazan, Astrahan jáne Omby qalalarynda saılaý ýchaskelerine kelip, QR Parlamenti Májilisiniń saılaýyna qatysyp otyrǵan alty saıası partııalarynyń bireýine óz daýysyn bere alady.
